Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat hertoge Maximiliaen troude ende besliep tot Ghent die princesse vrouwe Marie, hertoechinne van Bourgondien, etcetera, gravinne van Hollant, Zeelant, etcetera.
Dat XIII capitel.

Opten XVIII dach van Oest quam die hertoge van Oestenrijc binnen der stede van Ghent in deser manieren. Eerst quamen binnen der stede die gedeputeerde, die hem te moet ghesonnen waren; daeran des hertogen knechten, II ende II tesamen, alle in swarten gecleet, wel getuycht mit cluevers, spietsen ende bogen. Daerna quamen die regenten ende oversten van der stede, alle in witten gecleet, omtrent V C. Daeran quamen dye princen, heren ende edelen van den hove des princesse, als grave Jan van Chimay, grave Lodowijc van Winchestre, here van Gruythusen, meester Jan de la Bouverye, president, mit CC paerden. Daeran die princen, heren ende edelen van den hertoge, alle in swarten gecleet over hoer harnas, mit costelicke helmen, andere mit verchyerde hoeden ofte mutsen, andere mit bestricte ende borduerde mouwen ende op hoer hosen, omtrent tesamen IX C. Alle die straten waren behangen mit rode, witte ende swarte lakenen, mit menigerley spelen ende batamenten. Daeran quam die hertoge in vollen harnas, costliken verchyert, ende reet tot des prothonotarius logijs; ende dair stonden die heren ende oversten van den rade der stede van Ghendt, mit vele toortsen ende barnende waskaersen. Des avonts hadde vrouwe Margriete, hertoge Kaerls wedue, een costlic avontmael bereyt; ende daer quam die hertoge mit sine heren eten ende hoverende in grooter blijscappen. Des margens omtrent VI uren ghinc die hertoghe mitten aertsbiscop van Tryer, mitten biscop van Mets ende mitten Marckgrave van Baden in der hertoechinnen hof, tot in der capellen. Een luttel tijts daerna quam vrouwe Margriete, die oude hertoechinne van Bourgondien tot hem in der capellen, ende nam hem an dene side, hem gevende te kennen dwelc si in commissie hadde hem te seggen. Dat gedaen sijnde, quam hi weder in der capellen. Doe quam die grave van Chimay ende die grave van Wincestre, leidende die princesse, vrou Marie, tot an den eersten graet van der capellen, ende was gecleet mit enen costliken gulden stucke van witte laken van damas, ende daerover enen langen mantelle van denselven doeke gevoedert, mit arminen, ende was ombegordet mit enen costeliken gordele van gouden ende precieus ghesteenten, mit een gulden budele daeran hangende, ende hadde om horen halse enen al te costliken halsbant, mit menigen costeliken steen verchyert; ende stont mitten hare ontslegen,

[p. 372v]

blinckende als gout, ende daerop een bereytsel in manieren van eenre cronen, met costliken stenen ende duerbaer paerlen gechyert, dye als sterren stonden ende blincten. Die vrouwe van Ravenstein, hertoge Phillips bastert dochter, droech die slepe van der mantele, ende was gecleet mit een roet gulden stuck; ende beneven haer ghinc joncfrouwe Phillippe, here Adolfs dochter van Ghelre. Doen trat die hertoge Maximiliaen uuter capellen, ende ghinc staen op die overste graet; ende vrouwe Marie ende vrouwe Margriete, hertoechinnen, stonden beneven malcanderen, hebbende malcanderen by der hant. Doen quam here Lucas, biscop van Sibinicen, legaet des paeus van Romen, in sine pontificale; ende uut auctoriteyt ende machte des Stoels van Romen dispenseerde hi mit desen tween van der maechscape, daer si malcanderen in bestonden, als van der syden van Portegale; want vrouwe Ysabele, hertoge Kaerls moeder van Bourgondien, was een moye van vrouwe Alienora der keyserinnen, hertoechs Maximiliaens moeder. Dat gedaen sijnde, seide die legaet vele benedictien ende segeningen op desen tween, ende ten eynde van dien nam die legaet des hertogen hant; de hertoge in sijnre hant hebbende enen costeliken ring, ende stack die an der princessen voerste vinger, seggende: 'Mit desen ring geve ic u mine manlike trouwe'; ende ten anderde stac hi die an die middelste vinger, seggende: 'ende belove²⁷² u mijn trouwe te onderhouden'; ende doen stac hij se an die hertvinger, seggende: 'ende belove di te onderhouden alle datghene dat tusschen minen vader ende uwen vader ende onsen landen ende provincien tracteert ende ghesloten is.' Ende mit dien gaf hi haer een groot stucke gouts, dwelc si in hore budele stack. Ende doen gingen si in der capellen om misse te horen. Omtrent III voeten van den altaer waren II zetelen bereyt mit root, gulden laken becleet, ende daerop II groene gulden cussens, mitten wapen van Bourgondyen. Daer saten si die hertoge an die rechter side ende die princesse an die luchter side; ende voer den hertoghe sat joncheer Kaerle van Ghelre, in swarten gecleet, hebbende in sijnre hant een waskaerse; ende voer die hertoechinne sat joncfrouwe Phillippe van Ghelre, sijn suster, oec mit swarten ghecleet, mit eenre waskaersen in der hant. Ende here Lucas, dye legaet, sanc die misse; ende als dat offertory gesongen was, ghinc die hertoge ten outare, cussende die pathene; daerna die hertoechinne dyergelijken. Dat Pater Noster gesongen wesende, knyelden si beyde voer dat outaer; ende die legaet las over hen vele benedictien ende segeningen. Ende als dat Agnus Dei gesongen was ende men pays geven soude, doe gaf de legaet den hertoge een cusse an sijn wange, ende die hertoge custe voert dye hertoechinne an haer wange. Die misse voleint wesende, was daer heilich broot bereyt, dwelc die cappellaen van den legate nam, ende gaft mit een luttel wijns den hertoge ende der hertoechinne. Ende doe stonden si op ende ghingen uuter capellen. Die biscop van Tryer ende die biscop van Mets leyden dye bruyt uter capellen. Ende op desen dach was binnen der stede van Ghent grote blijscap ende vroechde onder allen den princen, heren ende edelen van den hertoge ende der hertoechinnen. Dese hertoge Maximiliaen wan bi sijnre huysvrouwe die hertoechinne enen soen ghenoemt Phillips, die na sijnre moeder here der landen worde; een dochter gheheten Margriet, ende noch een soen genoemt Franciscus, dye jong starf.

272 bolove AB.