Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat hertoghe Maximiliaen van Oestenrijc quam in desen Nederlanden tot Brusel in Brabant.
Dat XII capitel.

In desen selven jare van LXXVII, omtrent Sint Jans misse, heeft keyser Frederic van Romen sinen enigen soen, hertoge Maximiliaen van Oestenrijc mit groter triumphen ende feesten in desen Nederlanden ghesonnen, ende quam tot Coelen, daer hi omtrent een maent lanc bleef leggen, en bereyde hem in Brabant ende voert in Vlaenderen tot Ghent te reisen, daer sine bruyt, die princesse vrouwe Marie, begeerlic hem verwachtende was. Ende si hadde oeck notabele ambassaten ende edelen tot Coelen hem te moete gesonnen, ende op Sinte Pieters avont Ad Vincula is hi uut Coellen gereyst, hebbende in sijn geselscap den aertsbiscop van Ments; den aertsbiscop van Tryer ende den biscop van Mets; hertoge Aelbrecht van Sassen; marcgrave Cristofel van Baden; grave Aelbrecht van²⁷¹ Tshorelre mit meer andere graven, baenroedsen, ridderen ende edelen in groten getale, ende quam binnen der stede van Brusel, daer hi mit groter triumphen costlicheden ende feestlic ingehaelt wert van allen den ghilden ende ambochten van der stede, elcs gecledet wesende mit sonderlinge cledinge, mit vele toertsen ende toertysen. In den eersten quamen alle die ghilden in hore cledinge als voorscreven is; daeran die geestlike personen in hore religye; daeran die burgemeesteren, scepenen ende raden van der stede. Daeran quam gereden Johan, hertoge Jans soen van Cleve, in sinen harnas, hebbende daerover eenen costliken, duerbaren mantel van goude, silver ende gesteenten. Dairan quam in enen rosbaer

271 van van AB.

[p. 372r]

geseten hertoge Jan van Cleve, grave van der Marcke, een out, cranc man mit derdalf C paerden. Dairan quam gereden enen langen groten wimpel van swarte syden, daer een scone vrouwe in berduert stont, hebbende in hoer hant een hartken mit een rolle, daerin gescreven stont des hertoechs avys: 'Hout maet in allen dinghen.' Ende daeran quam gereden in blinckende harnas dye scone ende vrome jongeman hertoge Maximiliaen van Oestenrijc, ende beneven hem dye aertsbiscop van Tryer mit anderhalf C paerden. Daeran die aertsbiscop van Ments; de biscop van Mets; die hertoge van Zassen, mit dese nagescreven heren ende vorsten, als dye hertoge van Gullic ende van den Berge mit III C paerden; die marcgrave van Baden mit sijn II sonen Adolf ende Philips; die grave van Aenholt; die grave van Nassouwen ende van Witzbaden; die grave van Helfenstein; die grave van Zolms; die grave van Tshoerlre; die grave van Holloch; die grave van Momfort; die grave van Wijnsburch; die grave van Westerburch; dye grave van Polem; here Adolf van Bapperen; here Balthaser van Wolkenstein. Alle dese heren saten in blinckende harnas mit ontwonden wimpelen, ende alle die straten waren behangen mit scone tapeten ende andere costlicke lakenen. Ende alsoet een reghenachtich ende windich weer was, bedorven daer vele dingen, ende worden oec vele triumphen ende costlike batamenten om dat ongetemperde weder aftergelaten. Ende die hertoge hadde sijn logijs in des biscops hof van Camericken, ende hi bleef daer enige dagen leggen in groter bliscappen ende vrolicheden.