Hoe dat dat huwelic tusschen hertoge Maximiliaen van Oestenrijck ende vrouwe Marie van Bourgondien ratificeert, approbeert ende gesloten wert.
Dat IX capitel.
Als dye edele princersse vrouwe Marie, hertoge Kaerls van Bourgondien enige erfdochter, geboren van sijnder anderde huysvrouwe, Ysabele van Bourbon, in allen horen vaders landen ende provincien ontfangen ende gekent was voir ene vrouwe ende princesse van den landen, heeft men seer naerstelic tracteert onder den edelen ende steden van den landen omme dese edele ende suverlike princesse te bestaden an enen edelen, vromen ende geboertigen prince ende here, waerbi dat dye landen in goeder policien, justicien, wetten ende loyen onderhouden mochten werden, ende daerenboven van allen anlopen ende oerlogen bescermt ende in goeden rusten ende vreden conserveert ende gehouden mochten worden, so sijnder vele grote princen ende vorsten geweest die dese princersse gaerne te huweliken ghenomen hadden, onder diewelke datter II princepale waren, als Frederic die III, keyser van Romen, in den name van sinen soen hertoge Maximiliaen van Oestenrijc; dye ander was Lodowijc, coninc van Francrijc, in den name van sinen sone Kaerle, dolphijn van Vrancrijc, die niet meer dan VII jaren out was, ende senden desen II princen ende machtige heren dicwils tot haer hoir ambassaten ende legaten. So heeft si dan ten lesten hoer consent ende wille gegeven totten hertoge Maximiliaen van Oestenrijc, out wesende omtrent XVIII jaren. Ditselfde hadde hertoge Kaerl, haer vader saliger gedachten, mitten keiser Frederic tracteert ende gesloten in den jare M CCCC LXXVI, op Sinte Katrinen dach, in den belegge voer Nuys; ende dye brieven daervan gemaect ende besegelt worden der princessen presenteert ende gelesen bi den eerwaerdigen here Jorijs, biscop van Mets; so wert dan een grote generale dachvaert geleit ende gehouden in der stede van Loven, daer alle die edelen, steden van den landenGa naar voetnoot268 ende provincien der princerssen vergaerden. Ende daer wert eendrachtelic gesloten, concludeert ende determineert, dat die edele scone princersse, vrouwe Marie, soude nemen ende trouwen tot horen geechten man ende voecht, den edelen hoechgheboren vorst ende prince hertoge Maximiliaen van Oestenrijck, des keysers Frederijcs die III sijn enigen soen; ende hiervan worden sekere vaste brieven gemaect ende besegelt, ende worden denselven hertoge over gesonnen. Die gelesen hebbende, was hi uutermaten sere verblijt, ende desgelijken sijn vader die keiser.
Auteursrechtelijk beschermd