Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dye van Dordrecht ende van Schoenhoven hem hadden nae des hertoghen doot van Bourgondyen.
Dat sevende capitel.

[p. 369r]

Als die gedeputeerde der stede van Dordrecht van der generale dachvert tot Ghent gehouden wedergekeert waren, so ist op eenre tijt geboert datter een beroerte ende opstal geresen is onder den poorters ende ingeseten van der stede tegen den ouden ende nyewen regenten ende outsten van der stede, vergadert wesende op die Raetcamere van der stathuys; ende was desen oploep also wel tegen die Hoecxs als Cabbeljaeus partye, onversceyden, om die wetten ende oude costumen te onderhouden. Die regenten seyden: 'Wi sullen voertan onderhouden ende doen houden die oude privilegien, vryheden ende hantvesten van der stede, na ouder ghewoenten ende costumen.' ( 'Daer en sijn wi niet mede te vreden, mer wi willen alle die exactien, excysen, ende scattingen geheel ende al of hebben, daer wi dus lange mede sijn beswaert geweest!' Boven dit wouden si noch rekeninge hebben van allen voirleden excysen ende scattingen ende van der stede goeden, die si ontfangen hadden. Ende als si dat beloefden te doen, wouden die dekens van den ghilden henluyden in hoede ende vasticheit hebben ter tijt toe dat si hoer rekeninge gedaen hadden, omdat si niet ontcomen en souden. So worder dan vele gevangen van der Huecxker ende Cabbeljauscer partye, ende als si rekeninge bestonden te doen, worden vele van den Cabbeljauscer party bevonden²⁶³ der stede goeden genoten ende onder geslegen te hebben in grote somme van penningen. Ende als dese beloeft hadden ende gesworen die stede te voldoen binnen den termijn van II oft III jaren, worden si van der vangenisse ontslegen. Ende binnen corten tiden daer na dat si ontslegen waren, toghen si heimelick uuter stede woenachtich²⁶⁴ in anderen plaetsen, ende en wouden die loftenisse die si beloeft ende gesworen hadden, niet onderhouden noch die stede betalen; ende aldus behilden die Hoecxs partye dat regiment van der stede. Binnen²⁶⁵ den leven van hertoge Kaerle hadde here Jan van Wassenaer verworven dat casteleinscap der stede van Scoenhoven, hoewel here Gherrit van Poelgeest, ridder, die oude casteleyn, sijn penningen noch staende hadde op tvoorscreven casteleinscap, ende niet ontfangen en hadde. Ende want dat XVI artikel in der nyewer privilegien begripende was, dat alle diegene die recessen staende hadden op officien, dat dieselve, oude officieren hoer officien weder anvaerden souden ende bedienen; ende aldus quam heere Gherrit van Poelgheest weder op sijn officie van den casteleinscap van Scoenhoven. Ende die wile dat here Jan van Wassenaer castelein van Scoenhoven was geweest, hadden die Cabbeljaus die stede regeert; waerom dat men oec rekeninge van der stede goeden hebben woude, dwelck si nyet wel doen en konden, ende togen veelal heimelic uuter stede. Corts daerna ontfinc here Gerrit van Poelgeest sine recessen ende uutgeleide penningen van den casteleinscap van Jan Gerritssoen van Assendelf, ende hi gaf hem dat casteleynscap over in sinen handen. Ende dese uutgeweken van Scoenhoven arbeyden ende solliciteerden dagelixs seer mit grooter instancien an den stedehouder van Hollant, den here van der Vere, dat si tot horen wille hadden mogen wederkeren binnen Scoenhoven op hoer oude officien ende diensten. Mer die here van der Vere, die stedehouder, die een seer vreedsaem ende goedertieren man was, en haeste hem niet seer om sulken saken te volbrengen; waerom dat die Cabbeljaus enen nydigen toern ende haet op hem grepen, seggende: 'Dese man en wil gheen recht noch justicie in den landen doen.' Die here van Montfoert verhorende dat die partyen aldus in Hollant tegen malcanderen begonnen op te staen, is hij seer favorabel ende gonstich gheweest die van der Hoecxs partye, ende quam tot Dordrecht ende Scoenhoven, ende hadde vele communicatien ende heimelike spraken mit hemluyden, gevende raet ende daet daer hi konde ende mochte

263 bevouden AB.

264 woenachctih AB.

265 Binnnen AB.