Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat sommige van den officieren van hertoghe Kaerle ter justicie gheset worden ende gherecht.
Dat III capitel.

Die ingheseten ende poorteren van Ghent ghingen daghelixs noch int harnas, ende wouden dat men dese gevangen heren ter justicie setten souden, om een saec des doots an hen te vinden. Soe hebben si in den eersten heren Willem Hugonet, ridder, ende doctoer in beyden rechten, so vele tormenten ende pinen angedaen, dat hi bi confessie belyde, brieven ontfangen te hebben van hertoge Kaerle van Bourgondien, dye seer deerlicken ende clagelicken luden, in den tiden dat hi in groter prerikel ende node was, leggende voer die stede van Nansi, scrivende om hulp ende bystant van volck, ghelt ende vitaelge, welke brieven hi verborgen hadde gehouden ende niet ter voirschijn hadde gebrocht, omdat sine begeren ende tinhouden²⁵⁷ van den brieven niet volbrocht noch volcomen soude worden; ende in dyerghelijken manieren worden dandere gevangen mede gepinicht, daer si wonderlike dingen ende heimelike saken of vernamen; waerom datter gesloten wert, dat men se ter justicie setten soude, ende rechten se mitten swaerde, uutgeseyt die geestelike personen, als den prothonotarius, die si gevangen setten in eenen duysteren prysoen, om sijn leven daer te eynden. Ende desgeliken den deken van Sinte Donaes te Brugge; mer dese quam namaels uut. So is dan een hoech scavot gemaect opten Witten Donredach des avonts te IIII uren. Daer stonden die ghemeenten van Ghent, ende wouden justicie gedaen hebben over dese drie. Soe wert eerst voertgebracht die cancellier; ende sine sentencie wert gelesen voir al den volcke, ende gaf hem seer devotelic ende willichlic tot sterven, ende wert onthoeft, ende sijn lichaem wert begraven tot Onser Vrouwen broeders in der kercken. Na hem wert gerecht here Jan Mel, ridder, ende wert totten Augustinen begraven. Doen wert voertgebrocht grave Ghye van Megen, heere van Humbercourt. Dese was soe sere gepinicht, dat men hem in een zetel dragen most, ende wert so, al sittende, onthoeft, ende wert van sine huysvrouwe ende vrienden mit groter eren ende triumphen van toortsen op enen wagen geset ende gevoert bi die stat van Atrecht, ende wert in sijn heerlicheit begraven. Dese here Ghye van Humbercourt was een here van der Oerden des Gulden Vlies, een wijs, goedertieren man in sinen daghen gheweest. Dit werck van deser justicie bedreven dye gemeente van Ghent als dolle

257 thinhouden AB.

[p. 367r]

ende rasende luden tegen wille ende consente van der princesse ende van al den heren, ende oeck van den rade van der stat. Niettegenstaende dat si presenteerden te rechte te staen ende hem te verantwoerden van tghene dat men hem op seide ende imputeerde, mer ten mochte hem niet baten, dat verwoede volc wouden se doot hebben.