Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van tgeen dat Jan van Boschuysen²⁴² mitten religiosen van Hollant handelde.
Dat XCII capitel.

Als nu den eersten termijn, Sint Jans misse, van der exactie der gheestliker personen omme gecomen was, is Jan van Boschusen mitten ontfanger van der penningen des scattinges weder in Hollant gecomen om die te ontfangen. Ende also die penningen noch nyet wel rede en waren, so verdroech hem die tijt wel tot Sinte Laurens toe. Ende doe waren sommige dye betaelden, ende sommige waren noch also ghesint dat si niet gheven en wouden. So is hi dan gecomen int convent van den regulieren buten Leyden, genoemt tot Lopsen, ende heeft aldaer die beesten uut die weyde ende uuten convente genomen, ende daertoe andere goeden, ende heeft se openbaerlic vercoft ende dat ghelt appliceert totter scattinghe. Diergheliken bedreef hi totten regulieren tot Leyderdorp, want daer quam hi ende sloech die poorten ende doeren van den convente op, ende nemende mit hem uuten cloester dat hem beliefde, ende sprac mit groter hoemoedicheit ende ambitie totten religioesen, priesteren ende broeders, seggende: 'Ic sal altijt volbrengen mit groter naersticheit dat bevelen mijns genadichs heren van Bourgondien, ende bisonder in deser saken.' Ende sprac aldus voort veel sonderlinge woorden, die niet al en dienen te scriven, de vreesliken ende grijsliken in der goeder luden herten ludende waren. Ten lesten die andere cloesteren binnen Leyden verhorende tgene dat hier gesciet was, beduchtende dat hen diergeliken mochte gheboeren, maecten een compact ende compositie mitten ontfanghers van der schattinghe. Soe sijnder dan twe terminen gheordineert²⁴³ te betalen dese schattinge: dene ende deerste was Sinte Michiels daghe, ende den ander Kersmisse. Ende vele van den cloesteren in Hollandt, man-

242 aldus C; van Boschusen zeer slecht leesbaar AB.

243 gheordidineert AB.

[p. 364r]

nen ende vrouwen composeerden al heimelyc mitten ontfanghers tot dien twee terminen te betalen, als si deerste deden. Als nu dat anderde termijn anstaende was, soe quamen die ontfangers in Hollant tot Kersmisse, ende alsdoe en waren de zommige hoir penninghen nyet wel rede, soedat XIII dach int verbeyden gecomen was; weinich daghen hierna is een groot rumoer int lant gecomen, als dat hertoge Kaerle verslaghen was. Ende op dese tijt souden die ingeseten van den stede ende dorpen van Hollant, Zelant ende Vrieslant hoir scattingen mede betalen. Ende also dair een²⁴⁴ twist opgeresen was tusschen den ontfangers ende den betaelders ter cause van den munten, ende dese tidinge int lant seer verbreet wert, so behilden si mede haer penningen. Ende daerenboven waren daer enige ingheseten van den steden ende dorpen, die den ontfanghers dairtoe dwongen dat si hen hoer penningen ende gelden van der scattingen wedergeven mosten, ende waren seer gevreest van hoer live.

244 een was een AB.