Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

[p. 361r]

Hoe dat meester Anthonis Hanneron, deken Sinte Denaes tot Brugghe²²⁷, in Hollant quam om dese exactien te ontfanghen.
Dat LXXXVII²²⁸ capitel.

Als dese commissarien van desen exactien anmercten die volstandicheit der gheesteliker personen, hoer zinnen gescarpt hebbende, hebben den Brabanders looslic ende subtijlyc perduceert ende gebrocht tot betalynge der voorscreven exactien bi namtisacien. Daernae sijn die Zeelanders oec imduceert ende ghebrocht voer tmeeste deel tot betalinge der voorscreven exactien ende scattinge. Meester Anthonis Hanneron, merkende dat dye Hollanders int resisteren die protertste ende stantvastichste waren, is selver in persone in Hollant ghecomen, ende began uutermaten vreeslicken te procederen tegen den geestlicheit, om te vercrighen dye exactien; mer int procederen en profiteerde noch en vorderde hy niet, want si eendrachtelic mit malcanderen verbonden waren. Dit siende, heeft hi die geestlicheit doen verdachverden te comen in Den Hage, ende dede dair een costlike heerlicke relatie mit scone causen, om hemluden te induceren tot consenteringe van der scattinge. Ende na rijpen deliberatien dairop gehat, antwoerden die geestlike personen dat si van genen rechtswegen sculdich waren enige penningen te geven, ende gaven hem dieselve consultacie ende defensie in gescriften, allegerende vele ende ontallike capitelen in den geestliken ende waerlyken rechten bescrieven. Ende als si saghen dat si mit smekende ende dreygende woerden die geestlike personen niet brenghen en mochten tot consente van der contributie des scattings, hebben si zommigen van den geestliken citeert ende ghedaecht te comen in die stede van Woerden, int jaer M CCCC LXXV, omtrent des Heylich Cruys dach in den herfst. Die geestlicheit verduchtende aldaer comende gevanghen te worden op dat starcke slot en quamen daer nyet, mer sonden hoer antwoert ende opinien van dien in ghescrifte. Doen reisde meester Anthonis Hanneron tot Wijck by biscop David van Uutrecht, om met sijnre hulpe te comen totter exactien ende scattingen voorscreven, te ontfangen van den geestlicheit, ende dede se cyteren te comen tot Wijc, dwelc si deden, anhorende die peticien ende persuasien der heren van den Rade des biscops ende die relatie der commissarien. Ten lesten stont dair een op int midden, genoemt heer Arctur van Bourbon, des paeus prothonotarius, pastoer van der stede van der Goude, die mitten voorscreven meester Anthonis Hanneron uut des hertogen hof mede met hem gecomen was, ende siende dye grote volstandicheit van den geestlicheit, seyde aldus: 'Ghy heren, en wilt geen quaet hert ofte suspitie hebben op meester Anthonis, want hi noch veel min doet dan hem is bevolen; want ick verducht, ist sake dat ghi hem niet en obediert ende achtervolgt, voldoende na sine commissie, dat hyer in desen landen van Hollant executoers comen sullen, die gheen ondersceyt en sullen hebben tusschen die kercke ende den stalle, dye kelc ende den potte, den pateen ende den scuttel; want des gelijcs eylacen in Vlanderen gesciet is'; ende onder meer andere woerden sprac noch meester Anthonis Hanneron de proest voorscreven dat noch appellacy, noch recht, noch nantisfacie, noch²²⁹ paeus, noch keiser hemluden helpen soude mogen; mer bongre, magre, twaer georloft of ongeorloft, si souden moeten geven II oft III jaerrenten, al souden si hoer goeden roerende ende onroerende, kelcken ende ornamenten vercopen, si souden tgheven. Dyeghene die nu aldaer ghecommitert waren van den geestelycheit, antwoerden dat si gheen commissie en hadden van den anderen geestelicke persone om te consenteren in der exactien; waerom dat si weder citeert ende gedaecht worden te comen tot Scoenhoven in die maent van octobri. Mer tot deser plecken en quamen si oec niet, ende senden daer hoer antwoert mit brieven puer negatijf, dat si plat niet geven en wouden. Waerom dat de commissarien weder na Mechelen reysden, ende merckende dat si niet en vorderden, vonden si enen anderen raet ende manier. Die geestlicheit van Hollant hadden op dese exactie appelleert tottet Perlament van Mechelen oft int hof van Romen, ende also si dese appellatie niet achtervolgt en hadden, deden si se weder dagen tot Mechelen, ende meenden se mit dien te trecken int Perlement; mer si en quamen daer niet, ende senden hoer antwoert in gescrifte, dwelc te lang waer te narreren, ende laten

227 Bruggge AB.

228 LXXXII AB.

229 nonoch AB.

[p. 361v]

dat bliven.