Hoe dat die geestlike personen appelleerden tegen dese exactien ende scattinghen.
Dat LXXXVI capitel.
Omtrent tbeginsel van den Vasten int jaer M CCCC LXXV, sijn die commissarien van deser collectien der penningen gecomen in Hollant in Den Hage, houwende ende tracterende scarpen ende subtijlen raet hoe si best dese scattinghen van den geestelicken personen crigen souden. Want alle die gemene geestlicheit hadden geantwoert negatyf, ende waren gesloten een penning niet te geven. Aldus tracteerden si om te vinden enen anderen manier om te compelleren dese scattingen te geven. So is ene van desen commissarien ende exactoren gecomen tot Leyden des saterdages voer den anderden zonnendach in der Vasten, ende bestont enighe religiosen ende geestlicke personen violencie ende gewelt an te doene; mer die sake wert op die tijt gesuspendeert ende vertogen, ende quam dieselfde tot Delft om daer dyergeliken te doen. Dye geestlicheit vanGa naar voetnoot226 Delflant hilden raet hierop, ende appelleerden an tPerlament van Mechelen also veer dat georloft ware, hemluden daer te mogen appelleren ende compareren. Die commissarius van deser exactien accepteerde dye appelacye, ende is wederom ghetoghen tot Mechelen tot meester Anthonis Hanneron, proost Sinte Donaes tot Brugghe, sinen heere, dyewelke een princepael ende overste capiteyn ende aenhever was van desen adinventien ende voernemen. Ende die copie des voorscreven appellacie autentijcke heeft dye gheestlicheyt ghesonnen enen excellenten ende experten doctoer, ghenoemt meester Raymondt tot Loeven, denwelken alle die gheestlicheyt der landen van Brabant, Hollant, Zeelant ende Namen eendrachtlyc eligeert ende ghenomen hadden tot horen advocaet, daerof makende een instrumendt bi notarius ende tughen.
Auteursrechtelijk beschermd