Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van den orloge die die coninc voirde tegen des princen landen, terwijlen dat hi voer Nuys lach.
Dat LXXX capitel.

Nu willen wi spreken van den orlogen die gescieden tusschen den coninc ende des hertogen landen. Als nu dat bestant tusschen den coninc Lodewijc van Francrijc ende den hertoge van Bourgondien experiert ende ten eynde gecomen was, ende die hertoge hem noch onthilt in den beleg voir die stede van Nuys, heeft die coninc een groot, swaer volc van wapenen vergadert, te paerde ende te voet, ende is mit groter heercracht gecomen int lant van Piccardien, Artoys ende Ponthi, ende in die landen dairomtrent. Ende is aldereerst gecomen voir die stede van Roije, ende heeft dat anghevochten; ende also si geen garnisoen in en hadden dye se bescermden, wert si haest gewonnen, ende alle dat si vonden ter wapenen sloegen si doot. Dairna togen si mit al hair macht voir Mondidier, dair een capitein in geordineert lach van des hertogen wegen. Dese moste van noetswegen die stede resigneren ende overgheven in des conincs handen. Vandaen passeerde de coninc mit al dat heer over die rivier van der Zomme, ende wan die stede van Braij ende Ankeren; ende quam weder op die Zomme, ende beleyde de stede van Corbij, in dewelke III capeteinen lagen, als die heren van Crufilgis, die here van Contay, ende here Peter van Miremont, mit C glavien.

[p. 358r]

²¹¹ Ende dese stede was wel bewaert, mit starcken muren, toornen ende poorten. Die coninck dede menich sware assault an de stede, scieten ende werpende grote sware stenen in dye stede, ende bestormde se tot vele stonden; mer die van binnen weerden hem vroemliken. Die coninc had II mael spraec mitten poorteren, dat si hem opgheven souden, mer si en wouden dair niet na horen; waerom dat dye coninc seer gram was, ende brocht zijn heer mit groten arbeit ende moyten doir de wijngaerden des abdie van Sinte Adelaert al heimeliken tot an die muren ende graften van der stede, ende doen si also seer benaut mit assaulten ende stormen, dat si hem noots wegen opgheven mosten, ende die coninc dede die stede verwoesten ende destrueren, ende alle dat lant dair omtrent. Voirt wan die coninck noch vele cleine steetkens, als Ruijen, Sinte Rijchaert, Durlans, Bappames. Noch dat graefscap ende stede van Marle, die stede van Lefere, Sinte Galbijns, Sinte Walrijcs, Cantey, Auxij, Miremont, Crevecuer ende Marruel. Die hertoge dit vernemende, sant terstont derwerts vele zijnre capiteinen mit groot volc van wapenen, ende quamen binnen Atrecht om den Fransoyzen te resisteren ende te wederstaen. Ende de coninc liep alle dat lant doir mit zijn heer, omtrent Heesdijn, Atrecht, Duwaij ende tlant van Rijsel; mer dese steden en mocht hi niet winnen, want si starc ende wel beset waren, hoewel si van malcanderen geen hulp of bistant en hadde; so viel nochtans een scarpe scermutsinge tusscen den Fransen ende Bourgongoens omtrent Atrecht, dair die Fransen die overhant ende victorie hadden. Ende dair werden gevangen heer Jacob van Lutzenburch; heer Philips van Bourbon ende van Carensij; die heer van Reymont; die heer van Conthaij mit meer ander edele ende goede mannen; mer de stat van Atrecht en konde si niet winnen, hoewel si dair grotelic haer best om deden. Binnen dese tijden dat dit gesciede zijn een deel ander Frans capiteinen gecomen int lant van Bourgondien, rovende ende brandende, doende vele scade van dootslage ende den lantluden gevangen te nemen; ende onderals hadden si gevangen den vroem heer van Rouchij, des graven zoen van Zimpol. Vele ende ontellicke scade deden die Fransen op dese tijt den hertoge van Bourgondien ende zijn landen, dwelc si nijmmermeer gedaen en soude hebben, had hi selver present ende int lant geweest.

211 CCC LIX AB.