Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van enen scermutsinge die die Fransoysen hadden tegen den Hollantschen scepen opter zee.
Dat LXXIX capitel.

In den jare M CCCC LXXV, omtrent Paesschen, als dat bestant tusschen den coninc ende den hertoge uutgegaen was, so sijn vergadert geweest enige zeerovers, ende hebben hem te samen verbonden te varen opter avontueren mit III carvelen, ende namen al ghevangen dat si vonden. Ende sijn ten lesten gecomen onder die custen van Zeelant, omtrent de stede van Goeree, ende vonden daer leggen visschen zommige van den armen luden, ende namen se gevangen. Ende senden enige van desen te scepe, ende dander behilden si om te trecken thuyswert ende gelt te halen, om haer gevangen te lossen, daer alle dat lant seer of in roere was ende gestoert. Dat derde scip van desen drie zeylde voert, ende quam voer Sceveningen ende Catwijc in Hollant, ende deden dair dijergeliken. Mer tmeeste deel was van Sceveninghen. Die van Sceveninghen ende Catwijc vergaerden alle tghelt dat si mochten, ende der kercken ghelden, ende quamen mit desen ghelden weder an desen scepen, om hoer ghevangen te lossen, dwelck dat si deden, ende verlosten alle hoer ghevangen. Ten lesten die van Sceveningen siende dat dat scip daer bleef leggen ende si tgetal van den rovers oec wel wisten, worden te rade dat si dat scip mitten rovers bevechten wouden, ende ontnemen hem weder dat gelt. Ende daer en lach mer een scip, want dander twe waren gezeylt na die stede van Amstelredam, om te sien oft sy daer enighe scepen op twater hadden mogen crigen; ende van daer togen sy na den eylande van Texel. Soe syn dan die van Sceveninghe al heymelick ghewapent wesende ghegaen in een pincke, om aen haer scepen te varen; mer een van hemluden clam boven in dye maerse, ende sach dat dander onder int scyp ghewapent laghen, want se hem niet wel bedect en hadden. Ende dat siende, toghen si hoer zeylen op in den toppe, ende seylden wech na den anderen, ende dese quamen ledich wederom. Nu was den tijt anstaende dat die van Ghoere hore ghevanghen lossen souden; soe hadden si een deel cloucke mannen onder int scip ghestelt, wel ghewapent. Ende boven en wasser mer III ofte IIII in hoer vischclederen ende caproenen aenghetoghen, ende stonden vast, ende sloeghen hoer handen om horen scouderen, recht oft sij coude ghehadt hadden, ende waren nochtans mede wel ghewapent onder haer clederen. Die rovers siende dat se hem na quamen, ende niet en wisten wat si wouden, togen hoer zeilen op om wech te zeilen oft van node waer geweest; ende ten lesten an

[p. 357v]

zekere teikenen bekenden deden si, dat se quamen om hoir gevangen te lossen. Ende ene van hem, die in den marse geclommen was, sach van verres oft si gheen harnas an en hadden; ende als hi anders niemant en sach dan dese, dede hy dat zeyl neder strijcken; ende was des margens vroe in der dageraet opten meyavont. Doen riepen die vischers totten capetein van den scepe: 'Belieftet u mit een bote te comen tot ons, oft willen wi comen bi u?' Ende hy liet se comen tot an hoir scip. Doen clommen III van hem int scip mittet ghelt, ende II hilden dat scip an boert mit veteren. Nu so was dye capiteyn allene boven op tscip mit V of VI van sine gesellen, ende dander lagen noch onder int scip ende sliepen. Doen setten si dat ghelt bi den mastbanc neder, ende begheerden hoer gevangen te sien. Ende mittien maecten die II een teyken mitten voeten, ende sprongen op, wel gewapent, ende dander namen enen hamer ende spijkeren, ende sloeghen die doeren van den scepe toe, dat ander rovers niet opcomen en mochten. Ende dye capitein hadde een silveren fleutken aen sinen hals hangende, ende dat menende te blasen wordet hem mit crachte benomen; ende si namen den capitein ende die ander VI gevangen, ende worpen die in hoir scip, ende voerden de mit hoer scip ende mit dat roofscip mit al den anderen zeerovers gevangen tot Gueree ende vonden dair in XLIX zeerovers, dien si alle gevangen setten, ende benamen hem alle hoir scat ende goet dat int scip was. Ende als si lange gevangen geseten had, scatten ende rantsoneerden si die rijke, ende dye niet en hadden benamen si slechts hoir goet, ende lieten se alte samen weder varen. Ende alsoet nu een openbaer orloge weder was tusschen den coninc ende den hertoge, ende die van Amstelredam westwert noch niet gevaren en hadden, ende hadden van den hertoge vercregen consent ende admissie, dat si oerloechsscepen ende op hoer eyghen geleyde varen mochten, hebben si toegemaect IIII grote scepen van orloge, ende hadden noch wel L grote scepen, ende op elck scip setten si XXV man, wel gewapent, mit bussen ende alrehande artelrije tot sulken scepen dienende. Ende stelden hem op wege om westwert te varen; ende also si hem vast byeen hilden, en dorsten hem die Franzoysen niet bestoken. Mer int wederom keren, als si hair comenscap hadden gedaen, quamen si wederom gezeylen mitten scepen van Hoern ende Enchusen, omtrent LXX scepen geladen mit sout. Ende als si quamen omtrent Clausdunen, vernamen si dair die grote Colompne van den Fransen scepen. Ende also si hem eer betrouden op die veelheit ende stouticheit hoirre scepen ende tvolc dat si in hadden, verachten si die Fransoysen, ende voeren onbehoedelic ende dwaeslic deen hier ende dander dair; wairom dat die Colompne mitten anderen scepen onder den Hollantsen scepen gecomen zijn, ende zijn de machtich geworden, scyetende met grote bussen, slangen ende andere instrumenten, ende worpen mit allen veel viers in die scepen, dat si die ten lesten machtich worden, ende vingen se al tesamen, uutgeseyt weynighe, die an tlant quamen, die te voet thuyswert liepen, verboetscappende den anderen hoe datter gevaren was, dair menich coopman ende scipper om verdorven was.