Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van den passagen ende lantscappen die heer Anthonis die bastert van Bourgondien doerreysde, ende hoe hem die paeus nobiliteerde ende legittimeerde binnen der stat van Romen.
Dat LXXVIII capitel.

Die edele ende vrome here Anthonis, grave van Steenbergen, hertoge Kaerls baster broeder, en was in desen belegge voir die stede van Nuys niet mede, als si belegen was, mer was gesonnen van sinen broeder mit groter staet ende ere als ambassate an den coninc Eduwaert van Engelant, die hem vruntlic ende feestlic ontfing. Ende dair wesende, wert by rypen deliberatien ende rade gesloten ende concludeert by den coninc ende den meesten heren des rijcs, dat so wanneer dat bestant tusschen den coninc Lodowijc van Francrijc ende hertoge Kaerle, sinen swager, experiert ende uutgegaen ware, dat alsdan dye coninc van Engelant selver in persone overtrecken soude mit macht van volc, om te conquesteren ende onder sine dominacie te brengen dat hertoechdom van Normandien. Dit aldus concludeert ende tracteert wesende, heeft die grave voorscreven oerlof genomen an den coninc ende is getogen bi andere princen ende machtige heren in diverse landen ende provincien. Ende alle saken expediert ende tot enen goeden einde gebrocht wesende, is hi omtrent Pijnster in den jare M CCCC LXXV gecomen tot Romen. Die paeus Sixtus dye IIII sinen toecoemst vernemende, sant hem teghen in den gemoet vele van sinen cardinalen ende andere van sinen edelen ende huysgesinnen, ende brochten hem mit groter eren in der stat van Romen opten Pijnsteravont. Des dijnsdaghes na Pijnsterdach node ons vader die paeus desen grave Anthonis mit hem te comen eten op tcasteel tot Engelburch, daer hi hem grotelic in eerde ende verhief, wanttet al te selden of nijmmermeer gheschiet, dat een waerlick prince oft here ten eten gaet op tcasteel voorscreven. Als nu aenstaende was dye hoechtijt des eerwaerdigen Heylighen Sacraments, heeft hem dye paeus bereyt mede in der processien te gaen. Ende alle ding totter processien dyenende bereyt wesende, is

[p. 357r]

here Anthonis geordineert te gaen an dye rechter sijde van den paeus, gecleet wesende mit gulden lakene, dragende in sine handen sekere insignien ende ornamenten oft cleynoden die men voer den paeus gewoenlic is te dragen in sulker feeste, ende an die luchter sijde ghing die cardinael van Sinte Peter ad Vincula, ende quamen mitter processien tot Sinte Jans te Lateranen. Dair wesende in der kerken, ging dye edele here Anthonis sitten op sine knien, voer den paeus, ende de cardinael voorscreven las over hem vele benedictien ende zegeningen. Dese gelesen wesende, heeft onse heylighe vader voorscreven van hem genomen alle illegittime ende onechtscappe, ende heeft hem legittimeert, nobiliteert ende een bequaem edelman gemaect, omdat hi edel van zeden, manieren ende wercken was, ende constitueerde ende maecte hem te wesen een successuer ende erfgenaem sijns broeders hertoghe Kaerls van Bourgondien, also veer hy gheen naerder oer ofte erfgenaem after en liete. Dit gesciet ende sijn saken daer hi om gecomen was expedyert ende volbrocht hebbende, is hi des saterdages dairna weder uut Romen gereyst, concomiterende ende hem geleydende vele van des paeus prothonotarien²¹⁰ ende andere prelaten van den hove. Ende oerlof an hemluden nemende, is hi gecomen bi sinen broeder den hertoge, die op de tijt seer siec lach, want hy hadde twe apostemen, ene in der kelen, dander in den halse, waerom dat meester Simon van Rotterdam, domproest van Uutrecht, sijn medicus, ende meer andere meesters, snellic ontboden worden ende hebben hem in corten dagen weder cureert ende gesont gemaect.

210 porthonotarien AB.