Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van enen twedracht die geviel na desen tractaet tusschen den zoudeniers des keysers ende des hertoghen.
Dat LXXVI capitel.

Desen tractaet voorscreven ordineert ende uut gesproken bi den legaet voornoemt, heeft den Keiserlicke Majesteit mitten IIII coervorsten an deen sijde, ende hertoge Kaerle van Bourgondien an dander sijde, belieft vast ende onverbrokelic te onderhouden; waerom dat men in des keysers here ende oec in des hertogen heer anders niet en vermoede noch en wiste, ten was een volmaecte pays ende vrede. Mer hoe oft in wat manieren, dat en wisten allene die soudeniren niet, mer oec vele van den heren ende capeteinen, want dat tractaet was allene gemaect tusschen den voergenoemden princen ende vorsten; waerom dat vele heren, ridderen ende sciltknapen des keysers des tractaets qualic te vreden waren, ende sochten vele occasien van twisten op des hertogen volc. Soe is dan opten XII dach van junio een twedracht op gestaen, want die Bourgonsen en wouden niet veracht, noch bescadicht wesen, daert in vrede ende bestant staenden was, ende hebben wederom genomen die paerden van den tochtwagens des marcgraven van Brandenburch. De marcgrave dit vernemende, dede dat te weten den hertoge, ende begeerde sine paerden weder te hebben. Dye hertoge woude sine begeerten voldoen, ende dede se soeken doir alle dat heer, mer si en waren nyet te vinden. Soe is dan een groot rumoer opgestaen, want des keysers zoudeniers wouden den Bourgonsen hoir paerden weder nemen; mer si worden vromelic wederstaen. Uut desen worden die poorten van Nuys weder gesloten; ende wat Bourgonse binnen der stat waren, worden gevangen; wairom dat de hertoge dit vernemende weder liet vangen alle des keysers volc dat in sine leger was. Ende als den avont gecomen was, toghen dye Coelschen na den Rijn toe, ende namen des hertogen scepen mit gewelt die daer geladen laghen, mit meest alle sine grote bussen ende andere strijtber instrumenten mit meer andere costlicheden. Ende deser scepen wasser thien, ende voirden die tot Coelen. Van desen geweldigen berovinge waren die biscop van Munster ende heer Willem van Aerdenburch die overste capiteinen, die den hertoge sere begeerden tot misdoen, vercorten ende scadelick te wesen an lijf ende goet, hadden si gemogen. Na desen heeft die marcgrave van Brandenburch sijn tenten opgeslagen op dat eylant daer dEngelschen te voren gelegen hadden; ende die keyser dede sine tenten ende pauwelunen oprechten ter plaetsen dair die Lomberden gelegen hadden, ende dye biscop ghing leggen in des hertoge plaetse, om die stede te²⁰⁴ defenderen ende te bescermen, oft die hertoghe die stede weder hadde willen beleggen. Want elck was verduchtende dat den pays dier gemaect was niet ghehouden soude worden. Niettemin so heeft nochtans de hoechboren voorst uut ingeboren edelheit sijnre herten gewilt ende begeert also dese pays angeheven ende bestaen was, dat men vervolghen ende onderhouden soude; wairom dat hi notabele ambassaten gesonnen heeft an den Keiserlicke Majesteit om weder te hebben sine scepen mitten artelrijen, ende anders tghene datter inne was. Dye keiser heeft raet mit sine heren hierop gehouden, ende heeft den hertoge ontboden dat men hem sine bussen, artelrye ende andere gereetscap ende instrumenten weder leveren soude, ende den scade dijer gedaen waren soud men restitueren ende vergelden op sekere condicien.

204 re AB.

[p. 355v]

Doen seyde die hertoge, hi woude simpeliken, sonder enige conditien, sine bussen ende anders dat hem crachteliken benomen wair wederhebben, of enen bloedigen strijt dairom vechten. Aldus en sagen die keyser mit zijn heren gheen beter, si en deden hem weder hebben alle dat hem benomen was; ende hem wert restitutie van allen scade ende costen gedaen.