Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat die hertoge zijn battaelgen ordineerde om te striden.
Dat LXXIII capitel.

Opten XV dach van mey, ende was des dages na Pijnster, is de hertoge getogen uut zijn parc dair hy in begraven lach, om hem te scicken te striden, ende is gecomen op een groot breet velt. Doen dede hi kondigen al zijn heer doir, dat elc zijn harnas rede maken soude: die hertoge wilde monster doen. Want hi hadde verstaen dat die keiser hem in sine leger versoeken woude. So heeft hem elck dairtoe gescict ende bereyt gemaect; ende hi is opgeseten ende heeft dat volc ende dat heer oversien ende gescouwet, ende heeft eerst in ordineert ende bestelt dat die grave van Megen, heer Jacob van Lutzenborch, die grave van Cremonen, heer Jacob Galeaers, ende heer Reijer van Bruechusen mit XIIII M gewapende souden bliven leggen in hair parcken ende legers voer de stede van Nuys; ende hi is uut dat parc getogen mit XII M glavien te paerde ende twe M te voet, mit clovers, armborsten ende met andere strijtber instrumenten wel toe gemaect ende bereyt; ende dede mit groten arbeyde ende moijete slechten ende effen maken de hovelen ende bergen ende andere weghen, om een plat velt te hebben op te striden, ende hadde vele serpentinen ende hagebussen doen ordineren onder die aerde, heimeliken tegen des keisers heer. Voort so ordineerde die hertoge sijn heer in XVI battaelgen, in manieren van een

[p. 353v]

scaecspulle mit menigerley bannieren ende wimpelen, ende verwachte op die selve stede den keyser mit zijn heer VIII dagen lang; mer als hi sach dat die keiser hem niet versochte, was hi in meninge hem te besoeken. So is hi dan gecomen des nachts voer des Heilighen Sacraments avont mit groten gelude van trompetten, mit ontwonnen ende blinckende bannieren, mit groten ghecrij ende geroep, hebbende omtrent C ende L serpentinen neffens des keysers leger over, ende ordineerde selver sijn volc in battaelge, ende sette se in der oerdenen. Ende sprac totten Engelschen: 'Ghy vrome cappeteinen ende mannen van wapenen, ghi hebt u zoudie ghisteren van mi ontfangen, ende nu sullen wi striden tegen dat Overlantse heer. Daerom hebt u nu als vrome, onversaechde mannen.' Ende dijergeliken sprac hi totten Lomberden ende tot anderen natien, begerende ende vermanende hemluden om eer ende prys ende victorie van hoerre vianden te vercrigen. Daer si alle gelijc op antwoerden, roepende mit luder stemmen, dat si bi hem leven ende sterven wouden; uut welken gecrij die keyser verstont, dat die hertoghe hem nakende was om te bevechten. Ende heeft by sinen maerscalck zijn heer doen ordineren ende scicken, om tegen den hertoge te striden. Als nu dye hertoge zijn volc ordineert ende gestelt hadde, is hi opgeseten ende reet voir henen, als een armborst scieten mach, ende hadde sijn blinkende swaert in die handt, ende liet dat omgaen, tonende zijn heer ende volc sijn grootmoedicheit ende vromicheit, ende quam doe weder onder sijn heer, ende reet doe allensken ende sachtelic na des keisers heer toe mit groten gelude van trompetten, mit ontwonnen ende blinkende bannieren. Als dye keyser dat sach, scicte ende ordineerde hi zijn heer te trecken uut den waghenburch, daer deerste of was die biscop van Munster, des hertogen naeste maghe, die oec seer begeerlic was des princen doot. Ende hilt scarpe avijs ende gesichte waer dat de hertoge selver in persone waer, opdat hi hem allene mochte bevechten ende ter doot brengen.