Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van eenre scermutsinge die de Coelschen hadden teghen den Bourgonschen.
Dat LXXI capitel.

Als die keyser opten Palmenavont binnen der stat van Coelen gecomen was, ende dye¹⁹⁵ grote, vierlicke hoechtijt van Paesschen nakede, soe isser weder een tractaet gehouden; want die eerwaerdige heer Alexander, biscop van Forlivien, Duytsche legaet des stoels van Romen van den paeus Sixtus die Vierde aldair gesonden, uutermaten naerstich solliciteerde ende arbeyde tusschen den keyser ende den hertoge enen pays ende vrede te maken van allen twisten ende discoorden. Dair en quam niet of, want elc seer opinioes in zijn concepten persevereerde ende staende bleef, ende en mochten van horen eersten opghenomen opinien niet bemorwet worden. So gescieden dan alle dage vele tractaten, ende dairentusschen quamen tot Coelen alle dage vele princen ende heren, mit groot volc van wapene. Uut allen desen worden omtrent CCCC reisigers ende CCC voetgangers ordineert, uutgelesen mannen, clouck ende vroem van oorlogen, hebbende tot enen capitein den marscalc des marcgraven Aelbrechts van Brandenburch, om te trecken int heer voir Nuys, op die sijde dair die hertoge lach. Soe sijn dan dese voorscreven opgeseten opten Beloken Paeschdach, des morgens vroe, ende sijn gecomen omtrent den leger van den hertoge, op een vierendel mile na, II uren na middage, ende slogen onderwegen doot enen scaepherder van den Bourgensen. Die hertoge dit volc van wapenen siende, sat selver in persone op mit een deel uutgelesen vrome mannen, mit ontwonnen bannieren, mit groten ghelude van trompetten, ende reet tegen hem in, ende scoerde met crachte dat Coelsche heer. Dair gheviel een harde scermutsinghe ende scarpe manghelinghe, doch int eynde weken die Coelschen, ende liepen sonder ophouden tot voer

195 aldus B; dede A.

[p. 352v]

die poorten van Coelen; ende daer bleeffer vele gevangen ende verslagen, ende quamen in veel minre getale wederom, dan si uutgegaen waren; want dair werter omtrent LXXX verslagen ende XL gevangen, ende souden altesamen gevangen hebben geweest, en hadde hem tslot tot Hulkenrode niet opengestaen, dair si opquamen. Die maerscalc, hoer cappetein, ontquam met enen snellen paerde, ende II van den edelen bleven¹⁹⁶ verslagen. Ende die Bourgonsse reden wederom, spolierende die gevangen van horen wapenen, ende quamen mit victorien ende blijscappen weder int heer. Corts daerna braken die Coelschen op uut horen leger, ende togen weder binnen Coelen, om mitten keyser te trecken te striden tegen die Boergonssen.

196 blenen AB.