Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat die stede van Lintz van den keiser gewonnen wert.
Dat LXVII capitel.

In den jaer M CCCC LXXV heeft lantgrave Henric van Hessen uut bevelen des keysers vergadert een groot machtich heer van volck van wapene, te paerde ende te voet, om de stede van Lintz te becrachtigen. In dese stede lagen van des hertogen ende des biscops wegen here Evert van Aerdenburch mit II M zoudenieren. Die lantgrave bestormde die stede dic ende menichmael mit scarpe assaulte ende stormen; mer die van binnen weerden hem vromeliken mit gescutte ende werpen van stenen. Ten lesten dede dye lantgrave opslaen vele

[p. 350r]

blochusen ende fortressen, dair hi die stede mede meende te dwingen. Die hertoge dit verhorende, sant derwerts here Philips van Bergen mit een groot deel knechten ende zoudenieren om die stede te ontsetten, ende reden darwerts. De lantgrave dit vernemende heeft zijn volc gestelt in ordinancie teghen den Bourgonsen. Ende als dander anquamen, vonden sij den lantgrave bereyt staende in ordinancie om te striden, ende scoten in den eersten angange mit bussen, slangen ende serpentinen mit allen seer op malcanderen; dair wert seer ghevochten an beyden syden; mer int einde vielen die Bourgonse so swaerlic opten lantgrave, dat hi ende alle de opten blochuse waren vluchten ende liepen wech. Dair bleeffer omtrent C geslagen ende XXV gevangen. Heer Evert van Arenburch scoot oec mit allen seer op de Overlantse, dair een groot heer ende ridder mit LX van des lantgrave volc dootgescoten worden. Ende als die lantgrave geweken was, deden si die poorten op, ende lieten den Bourgonse in, ende maecten die stede starc, ende togen dicwils uut, verbarnende int lant vele van den naesten dorpen. Als nu heer Philips van Bergen mitten Duitschen weder int heer gekeert was, ende hadden in die stede van den Duytschen binnen Lintz gelaten vele Walen ende Pickaerden, en waren die van Lintz niet mit allen dairmede te vreden. Dit vernamen die keiser ende anderen heren wel, ende quamen weder voir Lintz ende beleyden die stede; ende also die poorteren tweedrachtich van binnen waren, so wonnen de Overlantse knechten de stede seer corts dairna ende namen den poorteren ende alle hoir goeden in genaden. Dit en wert hem niet gehouden, want die Brandenburchse plonderden dye stede. Ende die Pickarden hadden dat slot dat binnen der stede stont an brande gesteken ende uutgebrant, dat wilen eer biscop Egbert van der Marc, biscop van Coelen getijmmert had int jaer M CCC ende LXIIII. Ende alle die si dair bevonden van zoudenieren van der Bourgonser sijden, verdreven sij of namen se gevangen, ende sloegen se oec vele doot. Ende dit was int beginsel van der Vasten. Ende boven desen soe wonnen die Overlantse noch vele steden, sloten ende fortressen, als Sijnslic, Remagen, Wijerkel, Rolantrecht, Conincwinter ende Heerspel; ende na desen, als nu die Rijn open was ende men varen mochte sonder hinder, sant die keiser zijn gereetscap van artelrije ende anders den Rijn neder tot Coelen, mit veel gewapens volcs. Dyergeliken deden mede die hertoge van Sassen ende die marcgrave van Brandenburch, beyde coervorsten ende machtige princen.