Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat die coninck van Denemercken int heer quam bi den hertoge om te dadinghen, ende hoe enige uut Nuys quamen die gevangen geseten hadden.
Dat LXVI capitel.

Omtrent dese tijt was coninc Cristiaen van Denemercken, Noerwegen ende Sweden gecomen van sine pelgrijmaedge van Sint Jacob in Galissien; ende vernemende van desen groten twist ende oerloge, is hi getogen mitten grave van Oldenburch, sinen broeder, ende met sinen zone, mit hertoge Frederic van Bruijnswijck ende van Lunenburch, mit hertoge Jan van Sassen, mit hertoge Magnus van Mekelenburch, mitten grave van Rippijn ende mit meer andere

[p. 349v]

grote princen ende vorsten totten hoechgeboren vorst hertoge Kaerl, leggende voir Nuys, om te sien oft hijt yet hadde mogen dadingen¹⁸⁵ ende enen vrede maken; ende dit was omtrent Sinte Barbaren dach. Die hertoge vernemende sine toecoemst, geboet dat men mit eren ende feeste te moete riden souden, ende heeften mit groter reverencien¹⁸⁶ ende waerdicheit ontfangen; ende dair was grote blijscap, ende hadden te samen vele heimelike ende secrete rade ende spraken. Dairna XIIII dagen is hi bi consent ende belieften des princes getogen binnen der stat van Coelen om mitten keyser ende den anderen princen ende heren ende mitten Coelschen te tracteren om dese sake ende orloge tot enen goeden einde te brengen. Op dese tijt was dair mede een legaet des Stoels van Romen. Dese ende die coninc arbeyden seer naerstelic ende vlitelic tot vele tijden hebbende raet, om dese sake te decideren¹⁸⁷ ende desen twedracht ter neder te leggen; mer si en konder niet of maken, want de coninc niet al te wellecoem en was in der stat van Coelen, want si tot anderen tijden van hem bescadicht waren geweest. Doch scencten sij hem den wijn terwilen dat hi binnen Coelen was. Op dese tijt saten binnen Nuys gevangen XXV mannen van den Bourgoenschen. Dese hadden malcanderen los gemaect, ende arbeyden seer om uuter stede te comen. Nu soe hadden dye van Nuijs alle hoir volc ordineert in drije scaren ende partien; want als dene partie die wake hilt opter muren, ter wylen so deden die ander haer maeltijt; ende die derde sliepen. Ende als si horen tijt geslapen hadden, liepen si ter muren, ende die ander weder ter maeltijt ende dye derde te slapen. Die gevangen dit wel wetende, namen den tijt waer dat de geslapen hadden souden opgewect worden ende ter muren lopen, so sijn si uutgetreden ende liepen mede als zoudenieren ter muren; ende als den tijt van ten eten te gaen gecomen was, liepen die ander ter stat wert in, ende dese vielen over dye muren ende quamen ongescent weder int heer. De hertoge dede se voir hem comen ende vraechde hen hoet in der stede stont ende of si noch vitaelge hadden. Doen seyden si, dat in der stede van vitaelge niet en was dan coern, dair si broot of maecten; ende namen dat meel mit een luttel honich ende waters, ende maecten dair zupen of oft pappe. Ende brouden oec hair bier van tselve coern dat si hadden, ende en hadden oec niet van zuvels weghen dan paerde vleys, noch kaes, noch butter, noch vysch, want si wel CCCC paerden gegeten hadden. Van welcker tidinge die hertoge seer wel ghemoet was, hopende dat hi corts die stede wel tot hem crighen soude, omdat si so groot gebrec vitaelge hadden. Als die coninc van Denemerken als voorscreven is, lange tijt, omtrent V weken lange, mitten legaet binnen Coelen gearbeit hadde om enen pays ende vrede te maken, hebben si weynich in der saken profiteert ende gevordert, want elcs in sine opinie vast staende bleef; ende is weder uut Coelen bi den hertoge int heer gecomen. Ende siende dat hi niet en vorderde, heeft oerlof genomen an den hertoge, ende is weder na sinen landen gekeert. Binnen desen tijden dat dye coninc int heer lach, heeft hi sinen broeder grave Gherrit van Oldenburch mit groter triumphen ende feesten ridder gemaect, ende heeft hem verbonden mitten hertoge, makende mit hem aliancie; uuten welken dye hertoge minlicke briven gesceven heeft an heer Henric van tZwartsenburch, biscop van Munster, sinen neve, woude hi bliven in zijnre vruntscappen, dat hi dese here Gerrit van Oldenburch weder resigneerde ende gaven sine castelen ende sloten die hi hem ofgelopen hadde. Die biscop dit vernemende, was seer gram ende wert uut desen des hertogen openbaer viant, ende deden geliken de andere heren mede ontseggen, dat hem weynich vroomde, als men noch horen sal.

185 aldus B; dadinge A.

186 renerencin AB.

187 aldus B; decidere A.