enen brieve, ende dede hem weten ende begeerde ende geboot hem bi den ede ende huldinge die hi hem gedaen hadde, dat hi hem niet intermitteren noch onderwinden woude der kercken saken van Coelen, want si onder sine jurisdictie ende gebode niet en stonden, mer onder die sine. Ende geboot hem by den selven ede, dat hi den biscop van Coelen in gheenre manieren assistencie, hulp noch bystant en dede, noch en liete doen bi hem oft bi sine heren, vasallen ende ondersaten; mer dat hij hem des gansselic ofstaen, renuncieren ende abstineren wilde; want waert dat hij den biscop onttoge sine hulpe ende bystant ende hope van assistencie, hi hoepte bi hulpe van den coervorsten ende andere heren dese sake tot enen vrede ende composicie te brengen. Ende en woude hi des nyet doen, het ware gesien te comen tot prejudicie ende afterdele des gemenen kerstenheits, ende tware oec tegen wille ende consente ons aertssche vader den paeus; ende ten soude oec sine edelheit ende geloven niet betamen sulcx te doen; 'waerom wi an u begeren ende versoeken dat beste, nutste ende profitelicste hier in te willen doen, als wi uwe edelheit des betrouwen.' Als die hertoge dese reden ende woorden van den herault hadde ghehoert ende oec datselve in den brieve hadde verstaen, liet hi den keyser weder weten mitten monde ende met brieven, als dat hi mit ghenen onrechte noch niet willichlic dit oerloge angenomen hadde, als men meende, mer dat hij schuldich ware, als een lit des Heilighen Rijcs, den aertsbiscop van Coelen, die rechtlic ende eendrachtelic ghecoren ware, van den Stoele van Romen confirmeert ende mitten regeale van hem investeert, ende mit groten onrechte, tegen recht ende reden van alle sine goeden spolieert ende beroeft, dien te helpen ende assistencie te doen als een coervorst, ende niet van den minsten, omdat hi van sinen bloede ende na gemaecht was. 'So sijnder noch andere saken die mi moveren ende porren dit oerloge an te nemen, die ic houde dat si u een deels niet onbekant en sijn. Die heren van den capitel des Doems van Coellen sijn dicwils versocht geweest van horen here ende biscop, om dese saken ende twisten te submitteren ende tot payse te brengen; mer wat men hem te voren leyde ende proponeerde, twas altijt anders, men en mochter ghene composicie noch dadinge mede maken, die hem te wille was; ende dat daerom, als ic vernomen hebbe, want overmits sulke compositie souden si gehouden wesen te restitueren dat si onrechtlic besaten ende occupeert hadden. Want doen ic bi u tot Tryer was ende u te kennen gaf na den mael dat mi dat lant van Ferretten ontweldicht ende ofghegaen was, ende die capitelers dit verstaen hadden, maecten si een verbant mit sommige princen ende heren van Duytslant; ende na den male dat si verstonden dattet bestant tusschen den coninc van Francrijc ende mi experieren ende uutgaen soude, ende dat men my van allen syden bestriden soude, hebben si hem mitten selven coninc verbonden tegen mi; dat so wanneer hi tegen mi te velde gecomen hadde, souden si mit horen adherenten ende confedereerden mi ende mine landen ende ondersaten van achteren anbevochten ende bestreden hebben, tottet welc si gheen recht noch reden toe en hadden. Om deser ende andere saken voer narreert ende om des biscops injurie ende onrecht te helpen keren, hebbe ic mi mit recht ende reden tot desen oerloge gegeven. Aldus, dat mi groot ende waert is, dat acht ghy cleyn by avonturen, omdatter u geen baet an en is. Waerom hat ghi so sere pays ende eendracht begeert, ghi en soudet den lantgrave van Hessen noch den Rijcksteden tegen mi niet verwect hebben, ende en sout oec mine ondersaten, landen, steden ende dorpen niet gescreven hebben dat si mi of gaen souden; daer ic van als mit goeden autentike brieven of informeert bin, ende en hebbe dat op uwe mogentheit niet verdient. Daer en is prince in kerstenheit die meer vrede ende pays begeert dan ic doe, tot dien einde, dat men enen gemenen passage ende cruysvaert doen mochte tegen die ongelovige Turcken: dat weet God, Die alle herten kent. Aldus, als ic anmercke dat uwe Keiserlicke Majesteit sulcx doet, so scijntet dat u hert verde is van pays ende vrede te maken, ende en begeert niet dat ic abstinere ende ofstae van oerloge, mer geeft
Auteursrechtelijk beschermd