Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat die stede van Goch ghecregen wert.
Dat XLVIII capitel.

Als die hertoge binnen der stede van Venlo gecomen was, so lach op deser selver tijt een capetein binnen der stede van Venlo, genoemt Mathijs van Kessel. Dese viel over die muren, ende quam gelopen binnen der stede van Goch. Op die tijt lagen binnen Goch CC gewapent van Nyemagen ende CC van Zutphen mit een vroem cloec cappeteyn, genoemt here Reyer van Broechusen; ende als si allegader hoerden van desen capitein Matijs

[p. 335v]

van Kessel die victorien ende fame van den hertoge, waren sere beducht, hoewel si vrome cloeke mannen ter wapenen waren. Binnen desen tiden dat men voer Venloe lach, quam hertoge Jan van Cleve mit groter macht voer Goch, ende bestormde die stede tot veel einden; ende also die ingheseten van Goch ende zoudenieren hem vromelic weerden, ende keerden den Cleefsen buten hoer stede, so stont die hertoge of, ende reet weder na Cleef toe. Als dese Mathijs van Kessel binnen Goch quam, ende verbootscapte dat die hertoge binnen Venloe gecomen was, so ghingen die soudenyers ende alle die vreemde knechten toe tegen den nacht in den avont, ende bereiden alle die bussen mit hoer cameren ende stenen an die vesten, ende maecten alle gereetscap om den hertoge te wederstaen, ende ghingen eten ende slapen, ende bevalen die poorters die nachtwake. Ende des smargens, als si weder quamen, vonden si alle die cameren ende cloten van den bussen wechgedragen wesende ende verstroyt. Dit gerucht doer die stede gaende, togen terstont die burgemeesters van der stede na die stede van Cleve totten hertoge van Cleve. Here Reyer van Bruechusen mitten anderen dit vernemende, meenden verraden te wesen, ruymden snelliken die stede ende ghingen na Niemagen, latende die stede van Goch¹⁶⁵ sonder hoede, beducht wesende dat hem des hertogen heer overvallen mochte. Hierenbinnen dat die oversten van Goch bi den hertoge waren, ende hi hen riet dat si den hertoge van Bourgondien inlaten ende ontfangen souden, so quam here Anthonis, die bastert, graef van Steenbergen, gereden, mit X M gewapende, begerende die stede opgedaen te worden tot behoef des hertoechs van Bourgondien; ende als hem niemant en antwoerde, sant hi enen heraut binnen der stede, begerende dat die regenten ende raden van der steden op gelove bi hem uutcomen souden, belovende alle dinc tot enen goeden einde te brengen. Ende also alle doverste van der stede absent ende niet in der stede en waren, so ghinc de secretarius mit een van den outsten van der stede totten graef van Steenbergen, ende weinich spraec gehat hebbende, senden si terstont enen bode totten oversten, ende comende maecten si een tractaet mitten grave, ende brochten hem in der stede. Ende des dages dairan quam die hertoge selver in persone, ende wert minlic ontfangen ende gehult voer enen hertoge van Ghelre; ende vandaen toech hi binnen Cleef tot sinen neve den hertoge van Cleve. Hierna quamen vele van den oversten van den steden des lants van Ghelre, ende gaven hem op in des hertogen handen, op condicien waert sake dat hi die van Nyemegen verwonne, so souden si alsdan mede verwonnen wesen, ende doen geliken die van Nyemagen deden. Ende en dede hi des niet, so souden si van dien ongehouden¹⁶⁶ wesen, want si allegader groot betrouwen hadden op dye van Niemagen, omdattet een vaste ende starcke stede was, ende dat si wel beset ende versien was van vele cloeke ende vrome knechten. Ende die hertoge admitteerde haer begeerten. Die steden van desen waren Stralen, Nustat, Ghelre, Grave, Wachtendonck, Tiel, Bommel, Arkelens, Bueren ende Lendt. Ende dye ander steden, als Nyemaghen, Zutphen, Aernhem, Doesburch mit horen adherenten, steden ende sloten, bleven in horen ouden staet, verbindende hem mit malcanderen tegen den hertoge; ende onder allen anderen steden was die stede van Niemagen, die overste ende princepaelste van der rebelheit ende conspiracie tegen den hertoge, waerom dat se dye hertoge alreeerst bestormen woude.

165 Gcoh AB.

166 ongehonden AB.