Hoe dat die stede van Venlo belegen ende gewonnen wert.
Dat XLVII capitel.
Des anderen dages porrede hem die hertoge mit al sijn heer, ende quam die Mase neder, endeGa naar voetnoot162 beleyde mit groter heercracht dye stede van Venlo. Dit was een vaste stede ende starc, leggende op die Mase, wel beset mit luden van wapenen, hebbende vele cloeke ende vrome poorters ende waren van als wel versien des hem van node in den belegge wesen mochte; ende hadden die poorten, muren ende toornen wel beset ende bewaert mit bolwercken ende wijchusen. Ende als dat heer hem geordineert hadden, bestonden si mit groten bussen ende hooftstucken ende met andere instrumenten so vreeslijken in die stede te schieten ende te werpen, datter vele binnen gequetst ende dootgescoten worden. Die poorters ende die zoudenyeren stelden hem vromelic ter weer, ende keerden die vianden mit groter macht van die muren; mer die prince en ruste niet, dach noch nacht, mit swaren assaulte ende stormen die stede an te vechten; waerom dat die poorters seer beanxst worden, want si dicwils gehoert ende vernomen hadden hoe dat ander starcke ende mogende steden tegen hem niet gehouden en hadden, waerom dat si te rade worden ende gaven hem op in des hertogen handen, behouden hoer lijf ende goet. Ende alle dat volc quam binnen der stede, ende des smanendages naGa naar voetnoot163 des Heiligen Sacramentsdach quam die hertoge in persone binnengaende in der kercken, ende dede daer sijn gebet; als hi weder uuter kercken quamGa naar voetnoot164, dede hi een gebot gaen dat alle die poorters ende ingeseten van der stede comen mosten op die verboernis van lijf ende goet voer dat stedehuys; ende daerenbinnen reet hi selver langes die muren, bescouwende dye stat, ende hoe si bewaert was mit wallen, bussen ende strijtber instrumenten, ende tverwonderde hem dat si sulken vasten stede ende wel versien van artelrye soe gheringe opgegeven hadden. Die hertoge quam weder ter plaetsen daer dye poorters al vresende hem verbeiden, want si niet en wisten wat hi noch doen wilde, omdat hij so vele steden ende sloten gedestrueert ende verwoest hadde; ende merckende dat die poorters seere beanxt ende bevreest waren, en sprac hi hem niet scarpeliken mer sachteliken toe; ende als hi een lange relacie voer hemluden gedaen hadde, gaf hij hem weder haer lijf ende goet mit allen besittingen, uutgheseit II, die hem veel spijts ende injurie gedaen hadden, die hi in dieselve stede onthoefden dede. Ende alle die zoudeniers die hi bevant te wesen uut sinen landen ende provincien, dede hi tesamen binden ende in de Mase verdrencken; ende also die poorters den hertoge tegen hen bevonden minlic ende goedertieren te wesen, so hebben si hem goetwillichlic gehult ende ontfangen voer enen here ende hertoge van Gelre.
Auteursrechtelijk beschermd