Van den oerloghe die hertoge Kaerle hadde tegen den Ghelressen.
Dat XLVI capitel.
Dese voorscreven feeste ende triumphe van den Toyson geeynt wesende, sant hertoge Kaerle na den doot hertoge Aernts van Ghelre sine brieven ende mandamenten in allen steden des lants van Ghelre, beteykenende dat hi ware een warachtich hertoge van Ghelre, omdat hertoge Aernt hem dat lant goetwillichlic ende vry vercoft hadde bi sine opene besegelde brieven, waerom dat hi begeerde van denselven steden accepteert ende ontfangen te worden als een recht hertoge van Gelre, oft dat si dengenen hulden ende ontfangen souden die hi daer in sinen stede ende name senden soude; ende en wouden si dat niet, so woude hi dat mit heercracht comen bedwingen ende brengen tot sijnre subjectie. Die Gelressen dit horende, meenden dat hi geraest hadde; want twaer eer mogelic den hemel te vallen ende daerde te versincken, dan hi tlant van Ghelre winnen soude; ende sittende in die tavernen riepen al scimpende: 'Laet hi comen mit sine Piccaerden ende mitten Hollanderen, wi sullen se te degen expedieren'; want si waren tesamen gesloten, dat si hem liever int velt hadden doot te vechten, dan hem te geven onder des hertogen subjectie ende onderdanicheit. Waerom dat die hertoge geporret heeft in die meyemaent, vertreckende van Valencijn, ende quam tot in die stede van Maestricht, ende vergaerde daer een uutermaten groten hoop van volc van wapenen, alle uutgelesen campvechters. Die hertoge daer wesende, ontboet bi hem te comen die van Remonde, die van den lande van Cuyck ende van Kessel; dese beloofden hem mit vrientscappen te ontfangen, gesien die copien autentijck van den brieven des coops. Ende als die andere steden staende bleven in hore opinie, ende hem niet ontfangen en wouden, deelde ende sceide hi sijn heer in vele battaelgen, ende alremeest int graefscap van Moers, om te compelleren ende te dwingen tot sijnre obediencie; van welken bataelgen die princepale cappeteinen waren die hertoge selver, hertoge Jan van Cleve, here Anthonis die bastert, here Adolf van Ravenstein, here Henric van Parwijs, here Willem van Egmont mit sijn III sonen, als here Jan van Egmont, here Freric van Yselstein ende joncker Willem, ende here Gherrit van Culenburch. Ende hierna, als des woensdages na Pijnster, gaven hem vele steden op in des hertogen handen ende genaden, als Born, Sitters, Zuchteren ende Echt. Dese steden besat die grave van Moers, want se sijn vader wilen eer beleent hadde van hertoge Reinolt van Ghelre; mer als dit oerloge gesoent was, so ontfinc des graven soen van Moers dat graefscap van Moers van hertoge Kaerle te leen. Ende noch hadden des hertoghen volck beleghen dat starcke slot van Bruckom, toebehorende den grave van Moers; mer die borchsaten
Auteursrechtelijk beschermd