Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat hertoge Kaerle een feestliken hof hilt mit sinen broeders ende heren van der Oerden des Gulden Vlies of Toyson.
Dat XLV capitel.

Op dese tijt, als in den jare M CCCC LXXIII, omtrent Meydach, quam hertoge Kaerle mit groter feesten ende triumphen binnen die stede van Valenchijn in Henegouwen, om aldaer te houden die feeste van den Ordene des Gulden Vlies oft Toyson. In deser feeste ende solemniteyte quamen meest alle die heren van der ordene, die ic hier noemen sal, niet na hoer coemste ende hoge geboerte, mer nadat si in der Ordene geweest ende gecomen waren; ende eerst van den joncsten angaende, als here Lodewijc van Chattegyon, die heere van Clissi; here Jacob van Luxenburch; here Adolf van Ravenstein; here Phillips van Crevekoer; here Antonis, die bastert, des hertogen broeder; here Lodewijc van Gruythuysen, grave van Wintonien, stathouder van Hollant; here Jan van Lannoy, wilen stathouder van Hollant, ende tegen den hertoge weder versoent was; here Reynolt van Bredenroede; die graef van Rouchi; here Jan van Croy; here Simon van Lalleing, here van Montingy; dese XII voorscreven waren der self in persoen. Nu waren dair enige absent, als Alfons, coninc van Arregongen; coninc Eduwert van Engelant; hertoge Jan van Alleson; here Lebeen van Lannoy, here van Molenbays; here Jan van Melin, here van Auvijng; here Dibbalt van Nucasteel, here van Montange; dhere van Auxi; here Henric van der

[p. 334v]

Vere, grave van Grotevelt; hertoge Jan van Cleve, grave van der Marck. Nu waren daer sommige uuter Oerden gestorven, als die graef van Garny; die here van Cricky; here Antonis van Croy, here van Persi ende Renthi; here Franc van Borselen, graef van Oestervant; here Dibbolt van Nucasteel; here Jacob van Bourbon. Ende in deser heren stede ordineerde ende gaf die Ordene die hertoge desen na bescreven heren, als grave Engbert van Nassouwen, here van Breda; grave Jan van Marle, des graven soen van Simpol; grave Gwye van Megen, here van Hombercourt; grave Jan van Chimay; here Jan van Ruppenbre, here van Bevers; here Phillips van Zavoyen. Mer here Adolf van Ghelre en was hier nyet in deser feeste, want hi gevangen bliven moste int slot tot Cortrijc. Ende dair wert veel van hem getracteert ende gesloten, onder andere dat hi sijn leven dagen lanc gevangen soude bliven, omdat hi als een rebel ende ongehoersaem sone tegen sinen eygen vader ende here opgestaen hadde, ende sinen vader gevangen gehouden hadde; ende oec mede omdat hi sinen vader beroeft ende benomen hadde dat hem niet toe en behoerde, als dat hertoechdom van Gelre. Ende also die hertoge van Bourgondien dat hertoechdom van Ghelre van hertoge Aernt voorscreven bi sinen levende live gecoft hadde, so wert daer geconcludeert ende gesloten dat hi dat conquesteren ende mitten swaerde winnen soude, indien si hem niet goetwillichlick en gaven onder sine subjectie.