Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe hertoge Aernt van Ghelre oflivich worde, en hoe hi dat lant vercoft hadde den hertoge van Bourgondien.
Dat XLIIII capitel.

Int jaer M CCCC LXXIII, op Sinte Mathijsavont apostel, starf binnen der stede van den Grave hertoge Aernt van Gelre, als hi wat bet dan II jaren uuter vangenissen sijns soens gheweest hadde, ende wert mit groter eren begraven in derselver stede van den Grave. Hertoge Aernt, overmits grote gebreclicheit ende penurie, ende dat hem die steden van den lande van Ghelre voer horen here ende hertoge niet weder ontfangen wouden ende hem versmaden, so vercoft hi hertoge Kaerle van Bourgondien dat hertoechdom van Ghelre ende dat graefscap van Zutphen op Onser Liever Vrouwenavont Geboertenisse int jaer M CCCC LXXII, in tegenwoerdicheyt hertoge Jans van Cleve ende here Willem van Egmont, sinen broeder, om die somme van XCII M gouden Rijnsche Gulden eens ende om sekere renten, X jaer lanc ghedurende; ende als hertoge Kaerle vernam, dat hi doot was, began te aspireren ende te haken na dat hertoechdom. Die grave Vincent van Moers, die tot desen dagen toe als momber ende voecht dat lant regeert hadde, vernemende des hertogen meninge, begaf tlant van Ghelre ende toech binnen die stat van Colen, ende en dorst in sijn eygen lant van Moerse niet bliven, want hi des hertogen mogentheit ontsach, ende dat hi geen macht en hadde hem te resisteren ende wederstaen. Die overste banroetsen, heren, ridderen ende alle die ghemene steden des lants deden grote instancien ende versoeken an hertoge Kaerle om te hebben heren Adolf, horen here, tot enen hertoge ende prince van den lande; mer alle hoir bidden ende supplicacien en mochten niet baten, want hij moste penitencie doen voir dat hi sinen vader VI jaer lanc gevangen gehouden hadde boven recht ende reden, want die paeus van Romen ende die keyser hem bevolen hadden desen jongen here Adolf gevangen te houden int casteel van Cortrijc. Nochtans wert hem betamelike eerlicke diensticheit van edelen wel geboren mannen gedaen ende bewesen. Uut desen rees een groot rumoer ende murmuracie int lant van Ghelre.