Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat here Jan van Chimay, banroetze, ghecreeert ende ghemaect worde grave van Chimay.
Dat XLIII capitel.

Als die hertoge van Bourgondien weder in Vlaenderen gecomen was, heeft hij int beghinsel van den jare van M CCCC LXXIII een groot hof geordineert om den edelen here Jan van Chimay, banroetse, te creeren ende maken een grave. Ende als alle ding in der stede van Brugge daertoe dienende bereit was, quam die hertoge mit groter staet van princen, heren, banroetsen om dit werck te festeren: In den eersten here Jan, grave van Marle, des graven soen van Simpol; daerna here Anthonis, die bastert, grave van Steenberghen, welke graefscap hem sijn broeder, hertoge Kaerle, onlanxs te voren gegeven hadde; daeran volchde here Henrick van der Vere, grave van Grotevelt in Champangen; ende na hem quam here Wolfert, sijn soen, grave van Bocham, welc graefscap ghelegen is int conincrijc van Scotlant, ende hem te huwelic gegeven was van den coninc mit sine dochter, die dese here Wolfert ghetrout hadde tot sinen gheechten wive; ende dese IIII ghingen bereyt mit hoer lange sanguine bonte mantelen, mit hoir bonte bonetten, als graven plagen te doen; ende tusschen desen ghinc here Jan van Chimay, banroetse. Ende daeran quam de hertoge, mit uutgenomen excellentheit ende costlicheit van precieusen ghewade ende andere chyerheden van goude, silver ende costlike precieuse gesteenten, dat sijn bonet scheen vol sterren te staen. Ende die heren geseten wesende, elck na sinen staet, wert daer een costlike ende notabele relacie ghedaen van meester Willem Hughenet, ridder ende doctoer in beyden rechten, des her-

[p. 334r]

togen cancellier, een uutnemende wel sprekende ende gheleert expert man, dwelc te lang te vertellen waer. Dese oracie geeint wesende, wert die here van Chimay voer den hertoge ghebrocht in schine ende bereit wesende als een grave, ende vallende op sijn knyen, ende responderende op tghene dat hem gevraecht wert, gaf hem die hertoge een cusse voer den mont, ende ghinc weder sitten tusscen die IIII graven voorscreven, int middel; ende als die cancellier des hertogen mogentheit, liberaliteit ende edelheit een luttel commendeert hadde, stonden si alle ghelijc op, ende ghingen ter maeltijt; ende na den eten worden daer vele tornoyen ende steeckspelen, mit andere ridderlike oeffeningen mit groter triumphen ende feesten alle den dach doere gehouden.