Van vele oerlogen ende striden, die oec op dese tijt op die zee gevielen tusscen den Franchoysen ende Bourgongoens.
Dat XLI capitel.
Omtrent dese tijt dat dit oerloge duerde tusschen den coninc ende den hertoge, hadde die coninc geordineert ende doen maken vele scepen van oerlogen, onder diewelken dat een genoemt die Calonne, wanttet dat grootste oerloechsscip was, dat men ye gesien hadde, ende waren altesamen wel versien van bussen ende andere instrumenten, mit veel volcs vanGa naar voetnoot160 wapenen, ende zeylden alle die zeecusten langes in groter menichten, ende was in den tiden dat die Hollanders ende Zeelanders ten harinc voeren. Ende hebben op eenre tijt gevangen genomen XVIII Hollantse scepen, die bereit waren ten harinc te varen, ende namen dye stiermannen alleen gevangen, ende senden die andere mitten busen weder te lande, eysschende voer elken gevangen stierman C Francrijcse cronen van goude, sendende dese gevangen binnen Diepen ter tijt toe, dat si van hoer vrienden gelost worden. Die oerloechsscepen quamen op een tijt geseilen omtrent die Hollantse custen, tusscen Noortwijc ende Catwijc, daer si enige arme visschers vingen ende voirden se ter zeewert in. Die gemeen haringbusen uut Hollant ende Zeelant, die noch niet bereit en waren ten harinc te varen, dit vernemende, en quamen niet gaerne opter zee; waerom dat een groot rumoer ende murmureringe in den landen van Hollant ende Zeelant opgestaen is. So hebben dan die Hollanders oec vele scepen van oerlogen toegemaect om dese zeerovers ende Franchoysen van der zee te verdriven, ordinerende enen cappetein geheten here Pouwels, des heren Henricx van der Vere bastert soen, ende bereiden hem ende hoir scepen, versiende van alle des hen noot was, ende namen horen cours na deser Colonne toe. Die Colonne lach op dese tijt onder die custen van Scotlant, denwelken die Hollanders nazeylden, ende quamen in Scotlant; ende als die cappetein van der Colonne oversach die veelheit der Hollantscer scepen, togen si hoer zeylen op ende zeylden weder na Francrijc, ende die Hollantse scepen togen na huys toe; ende corts daerna werter weder een bestant gemaect, durende totten XV dach van aprille naestcomende, int jaer van LXXIIII.
Auteursrechtelijk beschermd