Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat sommige zeerovers in Den Hage gherecht ende op rader gheset worden.
Dat XXXIX capitel.

[p. 332r]

Omtrent Paesschen in ditselfde jaer van LXXI, quamen een deel zerovers geseylt die Mase in, tusschen die stede van den Briele ende tsGravensande, ende ghingen binnen die stede van den Briele, in scine oft coopluden geweest hadden, ende coften dair alle dat si in hoer scip behoeven mochten. Ten lesten worden si verspijt ende verkent, dattet allegader zeerovers waren. Ende die scout mitten Rade van der stede deden se alle ghelijc vangen ende vast setten. Die ander, die int schip gebleven waren, dit vernemende, togen hoer anckeren op, ende zeylden die nacht langes den oever, ende quamen des smargens in der dageraet voer Sceveningen. Die scout van den dorpe vernemende dattet zeerovers waren, riep alle die visschers te samen, ende vielen se an boort, ende namen se gevangen, ende sant enen snellen bode in Den Hage an den Raet, ende here Phillips van Wassener, ridder, op de tijt baelju van der Hage, quam aldair ende brocht se alle gelijc gevangen in Den Hage. Ende als si geexamineert waren, bevant men in der waerheit dattet alle zeerovers ende pyraten waren, waerom dat si ter justicie geset ende allegader onthoeft worden ende op rader geset, tusschen Sceveningen ende Eykendunen, op die hoechste bergen ende dunen die daer lagen, opdat men se over alle dye zeestrange sien soude. Ende die Raet van Hollant sonden Willem, die bastert van Swieten, procurour generael, in Den Briel, mit veel volcs, ende brochten alle die ander zeerovers in Den Haghe, ende worden mede gherecht ende op rader gheset bi den anderen op hoge dunen. Ende deser wasser omtrent vijftich, alle meest uut Oestlant gheboren.