Van den oerlogen tusschen den coninc van Vrancrijck ende hertoge Kaerle, ende hoe hi Amyens beleyde.
Dat XXXVIII capitel.
Als die edele vorst ende prince hertoge Kaerle certeinlic ende sekerlic vernomen hadde, dat alle dese conspiracien, verraderien ende bedriechlicheden comende ende sprutende waren doer groten bedroch ende boesheit des coninc Lodewijcs van Francrijc, sant enen ambassaet tot Parijs, totten coninc, ende dede hem weten dat hi alle die boosheden ende conspiracien die hi tegen hem opnam, wel bekant waren; dat si uut hem ende niemant anders en quamen. Die coninc dese brieven gehoert hebbende, dehonesteerde ende onteerde desen des princen ambassiaet, andoende hem vele scoffiericheden, van slaen ende werpen, ende nam doe op den hertoge mere scade ende hinder te doen; want hi vorderde seer mit bedroch ende loesheit in te nemen dat lant van Ponty, dat doe stont onder die dominacie des princen. Ende dit lant van Ponty hadde dese coninc Lodewijc wilen eer gegeven hertoge Kaerle in dien tiden, als hertoge Phillips van Bourgondien hem weder brochte in der cronen van Vrancrijck, daer hi V jaer lanc uut verdreven hadde geweest. Ende repeteerde ende eysschede nu dit lant weder te hebben, allegerende dat dye crone sere daermede gecranct ende verachtert ware. Als die hertoghe dit vernam, begeerde hi van der stede van Abbevile dat si sommige soudenyeren van sinen volcke innemen wouden om dye stede te bet bewaert te sine; mer si maecten den hertoge wijs dattet van genen node en ware, want si binnen cloeck genoech waren ende oec wel bewaert van toornen, muren ende poorten. Die hertoghe dit horende, wert toernich ende hadde suspicie dat si aliancie ende verbandt mitten coninc gemaect hadden, sant in derselver stede so nu C knechten, so CC; ten lesten eenen ridder mit L knechten, dat hi also dye stede machtich worde, datter die coninc nyet in comen en mochte. Die coninc maecte vrede ende verenichde hem mitten princen ende vorsten van der cronen, opdat hi te vryliker ende sonder sorge tegen den hertoge soude mogen oerlogen. Ende dede vergaderen een groot machtich heer, ende sant die mit veel cappeteinen, ende wonnen die stede van Sinte Quintijns in Viromandoys, ende dye stede van Amyens, ende souden die stede van Doernic gaerne mede gewonnen hebben, mer die en cregen si niet. Die hertoge horende dat die van Amyens den Franchoysen ingelaten hadden, wert mit allen gram, ende vergaerde veel volcs van wapenen om die stede van Amyens te belegghen, comende daervoer mit groter macht van volc, ende stelde hem in een cloester dat buten die stede lach. Ende dat ander volc van wapenen dede hi logeren om die stede, ende dede eenen groten walle maken om dat parck, opdat sijn volc te bet bewaert soude wesen voer den Franchoysen. Die coninc hadde oec een groot garnisoen doen leggen binnen der stede; dese quamen dicwils uut ende scarmusten tegen dat butenheer, dat si bi wilen veel min weder binnenquamen, dan si uutgecomen waren. Ende hierenbinnen vernam die coninc van Vrancrijc dat coninc Eduwaert weder in die croen van Engelant gecomen, ende coninc Henric ghestorven, ende die prince van Waels, sijn soen, verslagen was, bestont om een pays ofte bestande te dencken. Ende daer wert weder in die meye bestant gemaect een jaer lang durende; ende die hertoge toech weder in sinen landen als hi XV weken voer die stede van Amyens gelegen hadde.
Auteursrechtelijk beschermd