Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe datter een grote twedracht opgestaen is tusschen hertoge Kaerle van Bourgondien ende den grave van Wervick.
Dat XXXI capitel.

In desen selven jare, als coninc Eduwaert die IIII moghentlick regerende was die

[p. 327r]

crone van Engelant, ende Richaert Nevel graef van Wervick, dye vele machtige heren ende princen tot vrienden ende magen in Engelant hadde, anmercte dat hi niet veel geestimeert ende gesien was in des conincs hove, so maecte dese grave Richaert een conspiracie ende aliancie mitten hertoge Jan van Clarence, des conincs broeder, ende gaf hem te wive sijns wijfs dochter. Coninc Eduwaert anmerckende dat hi der heren ende des volcs gracie niet en hadde, gaf hertoge Kaerle, sinen swager, sinen noot ende last te kennen, begerende raet ende hulp van hem. Die hertoge screef hem weder dat hi hem soude bewisen coninc van Engelant te wesen, doende justicie ende recht over denghenen die hem rebelle ende wederspannich waren. Die coninc dit verstaende, reysde van lande te lande, van stede te stede, ende van deen plaets ter anderen, doende justitie van den rebellen ende sine adversanten, ende dede vele van den edelen ende besten van den landen onthoefden ende doden, die hi wist hem meest contrary ende rebel te wesen. Die grave van Wervic ende die hertoge van Clarence, des conincs broeder, dit siende, begonnen tegen den coninc openbaerlic op te staen, ende hebben hem tegen den coninc verset. Die coninc dit siende, heeft sijn naersticheit gedaen om mit alre macht sinen broeder ende den grave voorscreven te vangen. Si sijn mit scepen ontcomen ende uuten lande getogen. Als die graef gecomen was voer die stede van Calys, hopende mit dien hem te bescermen tegen den coninc, hi en mocht daer niet in, ende is mit groter confusen ende scande weder tot sine scepen gegaen; ende sijns wijfs dochter, des hertogen van Clarencen wijf, wert haestelic bevangen ende baerde in den scepe een vrucht. Die graef siende dat hi van allen desoleert ende gelaten was, is gevaren in Vrancijc, ende die coninc Lodewijc heeften onthouden een wijl tijts, ende gheneerden, ende gaf hem te roven opter zee opten landen van Hollant ende Zeelant ende andere landen van den hertoge van Bourgondien. Ende heeft omtrent Paesschen genomen XXX scepen van den Hollanders, die om haer comanscap voeren oest ende west. Mer coninc Eduwaert sant terstont den grave van Scalle, des coninghinnen broeder, ende vercreech mit groten bloetstortinge die scepen, ende gaf se den Hollanders weder; ende die grave vloet weder in Vrancrijc. Ende hierenbinnen dede hertoge Kaerle vele scepen van oerlogen toe maken ende bereiden, om den grave van Wervic te wederstaen, ende vergaerde alle dese scepen tot Arremuyden, daer hi cappeteinen ende hoeftluden of maecte here Henric van der Vere; Dirc van Poelgeest, ende Jan van Boschusen. Ende here Franck van Borselen, grave van Oestervant sant hem mede te hulpe sinen bastertsoen, here Floris, mit vele vrome oerlochs mannen, die geleert waren te water te striden. Dairna, omtrent Pijnxster, als die grave den Hollanders spolieert ende benomen hadde XX scepen geladen met alreley goet, terstont heeft hem dye here van der Vere vervolcht mit XXXVI scepen ende mit VIII M man, ende jaechde den grave in de haven ende monde van der Zeine, ende daer gheviel een harde scermutsinge, sodat die here van der Vere weder creech X scepen, ende dander verbrande hi. Ende na deser victorie seylde die here van der Vere in Engelant om den coninc assistencie hulp ende bystant te doen. So geboerdet op eenre tijt, dat here Floris die bastert opt tlant trat om recreatie te maken in die stede van Hamton mitten burgeren; ende dese ingheseten van Hamton waren des graven vrienden van Wervic, mer dat en wist hi niet; ende vernemende dat hi van den geselscappe was die opter zee lagen, liepen si te samen int harnas, roepende: 'Wervic, Wervick!', ende wouden tegen hem enen slach slaen. Here Floris siende dat si op hem quamen om tegen hem te slaen, begreep een stuck van der stede ende setten hem vromelic ter were, roepende: 'Bourgondien, Bourgondien¹⁴⁸!', ende daer wert mit allen sere gevochten. Ende hoewel si IIII man tegen een hadden, nochtans en mochten si hem niet verwinnen, wantter vele van den poorteren verslagen worden. Die coepluden van anderen natien ende landen dier doe vele waren, siende dattet here Floris int einde te quaet gecregen soude hebben, ghingen tusscen beiden partien, ende deden die poorters ofstaen, ende geleiden hem mit sine gequeste luden tot in hoer scepen. Coninc Eduwaert dit vernemende, quam mit macht van volc ende

148 Bonrgondien AB.

[p. 327v]

wan mit cracht dye stede van Hamton; ende daer worden vele van sine vianden verslagen ende verjaecht; ende die coninc besette die stede mit sine zoudeniers, ende sant den here van der Vere te hulpe XI scepen, wel toegemaect om die vianden te wederstaen. Ende mit desen verjaechden si alle die ander van der zee, dat die coopscepen ende vischers vry varen mochten, ende bewaerde die palen van den landen also, dat die grave van Wervick oft niemant opter zee comen dorste om den coopman ende haringman te bescadigen.