Van enen oploep ende rumoer die die ingeseten der stede van Purmurende hadden tegen horen here.
Dat XXX capitel.
In den jare M CCCC LXX was een van den poorteren gedaecht van der stede van Purmureynde voer den vierscare van den scout; ende also hi den eersten rechtdach veracht oft versuymt hadde, quam hi ende compareerde ten anderden dage, ende dede sijn ontscult, dat hi ten eersten daghe sieck gheweest hadde; dwelke here Jan, burchgrave van Montfoerde, horen heer, die daer tegenwoerdich was, van hem enen eedt eysschede alsoe te wesen; den eet gedaen wesende, bewees die burchgrave ter contrarie, dat hi op dien dach int velt geweest hadde, doende sijn werck; ende deden vangen om te voldoen van den quaden eet ende andere saken die hi op hem te seggen hadde. Doe wouden hem sine vrienden ende magen verborgen om weder te recht te brengen, mer ten mocht hen niet geboren. Doen togen si in Den Hage ende verworven van den Raet van Hollant dat men hem voer scepenen te recht setten soude, naer inhout hair privilegien; dwelc gedaen sijnde, wijsden die scepenen hem vry te wesen. Waerom datten die burchgrave weder vangen dede. Mer overmits den groten drange ende oploep des volcs, en mochten sijt nyet doen, ende jaechden den burchgrave mit alle sine dienres int scouten huys. Die burchgrave sant om hulp tot Montfoerde, ende daer quamen L cloeker mannen op tslot hem te hulp. Die poorters dit vernemende, cregen oec groten hulp ende bystant van wapenen ende volc uuten dorpen dair omtrent. Ende corts daerna quam die burchgrave van den slote mit alle sijn macht; dairtegen quamen die van Purmurende, endeGa naar voetnoot147 scoten mit allen seer opten borchsaten, ende drongen se weder aerselinc opten slote. Dit claechde die burchgrave den Raet van Hollant, ende stonden om dit excesse lange jaren in rechten. Ende alst hemluden wel III M Gulden ghecost hadde, worden si absolveert, ende hen werdt bevolen dat si voertan horen here gehoersaem wesen souden op dat hen niet argers en gesciede.
Auteursrechtelijk beschermd