Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat die here van Bredenroede uuter vangenisse, mit Jan van Amerongen, gelaten worde.
Dat XXIX capitel.

Hierna, als here Reinolt van Bredenroede die saken ende articulen die hem angeseit worden negeerde ende missakede, heeft hem dye prince van sijnre vangenisse doen ontslaen, ende dede hem te recht setten in presencie sijnre groter heren van den Rade ende des Ordens van den Gulden Vliese; ende sine vianden, adversanten ende accuseerders worden cyteert ende gedaecht na costume van den hove, om int openbaer gehoort te worden ende openbair justicie ende recht te doen; mer daer en compareerde noch en quam nyemant, waerom in den jare M CCCC LXXII, opten IIII dach van meye,

[p. 326v]

heeft die hertoge des heren van Bredenroede excusacien ende ontsculden accepteert, ende heeft hem te recht geset in den Raet sijnre heren van den Oerder van den Gulden Vliese. Die here van Bredenroede is gecomen mit groter staet ende geselscap van edelen, baroenen, ridderen ende heren in den rechtsale, hebbende bi hem here Engbert, grave van Nassouwen, here van Breda; den here van Cricky; here Simon van Lalleing, sinen soen, tot XI baroenen oft baroens sonen. Ende sijn advocaet heeft hem mit wonderlicke ende subtile eloquencie ende welsprekenheit van allen puncten ende articulen excuseert ende vry ghedadinct. Die hertoge heeft hem absolveert van allen rechten, judicerende hem ontsculdich te wesen van allen saken die men hem op geleyt hadde. Ende die here van Bredenroede mitten anderen heren, sine vrienden ende magen dancten den prince mit groter reverencien ende eerwaerdicheden. Daerna is hi gecomen ende ontfangen mit groter bliscappen ende vroechden van sine ondersaten in alle sine heerlicheden. Ende is daerna salichlic gestorven in den Here, int jaer M CCCC LXXIII, opten XVI dach van october, ende wert mit groter eren begraven in der kercken tot Vianen. Daerna II jaren wert Jan van Amerongen vry uuter vangenissen gelaten, want hij mede ontsculdich gevonden wert voer den prince; ende quam tot Uutrecht ende wert weder scout van der stat van Uutrecht. Ende soude here Ghijsbrecht van Bredenroede uut des biscops vangenisse comen, hi most den biscop geloven ende sweren nimmermeer in den Sticht van Uutrecht te comen. Daerenboven most hi hem resigneren ende overgeven die domproestye van Uutrecht. Ende als hij dit gedaen hadde, wert hi uuter vanghenisse gedaen int jaer M CCCC LXXIIII omtrent Onse Liever Vrouwen Hemelvaertsdach, als hij IIII jaren in der vangenissen geseten hadde. Ende is uuten Stichte van Uutrecht getogen tot in der stede van Breda, daer hi des jaers daeran gestorven is, ende wert begraven int cloester totten Carthusers, buten Sinte Geertrudenberge.