Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat die here van Bredenroede gevangen wert.
Dat XXVII capitel.

Hierna ist geboert in den jare M CCCC LXX, op Sinte Vitus ende Modestus dach, dat here Reinolt van Bredenroede ghesonnen wert van der stats wegen van¹⁴² Uutrecht om te tracteren mitten biscop van sommige saken hem committeert ende belast van den oversten ende regenten van der stat, ende is opgheseten, nemende mit hem sijn V bastert sonen, als Walraven, drossaet van Haghenstein, Reynolt, baelju in Voshol, Henric, Jan ende Jan; ende Gerrit van Rijn; ende reysde mit desen na Wijc te Duersteden, niet wetende van dye valsche verraderye die tegen hem opgenomen was. Ende omdatter ghene twist oft gheschille tusscen hem beiden was, so trac hi sonder wapen ende sonder grote familie ende huysghesinne. Ende comende in der stede van Wijck, gemoete hem een genoemt Phillepot, ende was des bisscops overste dienre, ende riep desen tot hem, seggende ende begerende dat hi sinen here den biscop seggen wilde dat hi dair gecomen ware, om sonderlinge saken te tracteren van der stats wegen van Uutrecht. Mer die bisscop ontboet hem weder, dat hi na den eten bi hem comen soude. Ende in teyken van vrientscappen sant hi den here van Bredenroede in sijnder herbergen spijs ende wijn overvloedelick; ende hi dancte den biscop sere van sijnre gracien ende miltheden. Nae den eten sant die here van Bredenroede Harman van Wy, een van des biscops dienres, die mit hem ghegheten hadde, om te vernemen wanneert mijn here den bisscop belyeven soude met hem te spreken, ende sette hem tijt tot na der vesperen. Ende binnen desen tijden maecte men alle gereetscap, ende alle dinghen worden bereyt ende gheordineert, hoe dat men desen goeden here valschelic ende verradelic vangen soude. Ende als alle dingen bereyt waren, quam dese Harman van Wy, ende dede den here van Bredenroede weeten dat hij boven quame¹⁴³. Soe stont daer een an die trappen ende

142 nan AB.

143 qname AB.

[p. 324v]

verwachte hem, ende deden boven comen mit sijn sonen ende mit Gherrit van Rijn; ende dander mosten beneden tslot bliven staen. Een luttel daer pauserende wert dair een dore opengedaen van een der cameren, ende hem wert geseyt: 'Here, treet hier in bi onsen here.' Ende ingaende en sach hi niemant. Daer lange tijt staende alleen, quam een geheten Alphons, ende seyde dat hi buten oerloeve van den biscop vandane niet en ghinge. Dit mishagede hem sere, dat hi daer dus allene stont onder desen IIII mannen, ende bestont te twifelen oft hi verraden mochte wesen, ende seide ten lesten: 'Wat beduyt dit? Waer is mijn here? Heeft hi yet op my te seggen, laet mij daerbi comen: ic wil mi verantwoerden.' Doen sprac Alphons: 'Alst tijt is suldi hem sien ende spreken.' Ende over een halve ure quam hi weder, ende nam des heren van Bredenroeden swaert van sijnder siden, ende seide: 'Het moet dus sijn, volcht mi na'; ende leiden op enen camer daer hi deerste nacht logeerde. Ende des anderen dages leyden si hem op enen camer van eenre starcken toorne. Die here van Bredenroede verwonderde hem sere hoe ende waeromme hem dusdanige dingen wedervoeren ende angedaen worden, gemerct dat hi tegen des heren genaden van Uutrecht niet mit woerden oft mit wercken misdaen oft ghebroect hadde, ende bat God den Here dat hi hem wilde verlenen paciencie ende verduldicheit, kennende dat men doer vele tribulacien ende persecucien comen moet int rijc der hemelen. Een luttel tijts hiernae quam een van des biscops dienres, seggende tot des heren basterts sonen dat si van den huse in haer herberge gaen souden. Mer si en wouden nergens gaen, si en wouden horen vader mit hem hebben, ende worden sere gram opten genen die hem van den huse hieten gaen. Ten lesten werden die scutten van der stede opt huys ontboden, ende doe mosten si bi bedwange van den huse gaen, ende werden geleyt in haer herbergen; ende hem wert bevolen daer niet uut te gaen dan bi consent van den bisscop.