Hoe dat een heimelike conspiracie ende verraderye opghestelt wert tegen here Reinolt van Bredenroede, baroen.
Dat XXVI capitel.
In den jare M CCCC LXX began ende opstont die persecutie ende vervolghinge ende een heimelike conspiracie tegen den edelen baroen here Reinolt van Bredenroede, ridder, ende God die Here heeft hem dit angesonnen ende laten gescien, allen edelen tot enen exempel der paciencien ende lijdsaemheit als Hi die goede ende heilige man Sint Job liet gescien, om te lichtiger van sinen sonden ghevrijt te worden. Dese goede here ende edele baroen heeft vele geleden, mer God die Here heeften van als verlost. Want hi out was omtrent LX jaren, sijnder enige nidige menschen geweest in den Gestichte van Uutrecht ende in Hollant, edele ende onedele, die hem starckelic geset hebben om enen verradeliken conspiracie te maken tegen den voorscreven baroen, ende waren dairop uut om sinen naem ende geslachte te verdriven ende uut der menschen memorie te doen: niet om enige witlike ende redelike saken, mer alleen uut duvelscher ende vermaledider partien, die si int herte begraven hadden. Dese vermaledider menschen, merckende dat dye here van Bredenroede in rusten ende vreden levende was ende by den biscop van Uutrecht ende onder den burgeren ende heren vander stat geestimeert ende gheacht was, en konden dat niet wel mit gelijken moede dragen. Waeromme dat si secretelic ende bedriechlic ghingen tot hertoge Kaerle van Bourgondien ende bisscop David van Uutrecht, sinen broeder ende diffameerden, scoffeerden ende belogen desen edelen baroen tegen hore genaden. Die biscop David gelovende sere deser luden woerden, was alte seer geneycht om desen here te tribuleren ende te quellen, want hi meende datter hem grote profiten ende vruchten ofcomen souden. Nochtans hilt hi dit bedect ende en gaf dit niemant te kennen, want hi kende den here van Bredenroede te wesen een cloeck voersichtich ende wijs man, ende dat hi vele vrienden in der stat van Uutrecht ende buyten in den Stichte hadde.
Auteursrechtelijk beschermd