Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe die hertoge Kaerle admitteerde ende consent gaf dat men dye stat van Ludic weder optimmeren mochte.
Dat XXII capitel.

Ende als die stat van Ludic dus deerlicken ende jammerliken desoleert ende verwoest lach, verbrant ende ter nedergeworpen ende die hertoghe verstaen hadde dat noch vele kercken, cloesteren, gasthusen waren bliven staen, ende datselfde mitten ogen bescouwet had, heeft hi compassie ende medeliden gehat; ende opdat alsulke scone edificien ende timmeraertsen, als die Domkercke ende andere collegyen ende prochykercken mitten cloesteren nyet ledich (ende¹³⁶ sonder den dienst Gods daerinne te doen) staen en souden, ende dat alsulken vermaerden stat sonder huysen ende woningen, noch sonder burgers ydel ende ledich staen en soude, ende dat dat lant daer omtrent niet verwoest noch ongebouwet bliven soude, heeft hi uut sijnder groter liberaliteyt ende genade admitteert ende geconsenteert den burgeren die wilen eer tot hem ende den biscop, sinen neve, haren toevlucht genomen hadden (mer niet den ballingen ende rebellen, die tegen hem ende den biscop sinen neve opgestaen hadden) dat si die stat ende die husen dairbinnen souden mogen repareren ende weder optimmeren, ende gaf oerlof dat alle mannen ende vrouwen uuten landen van

136 Haakje openen ontbr AB.

[p. 322r]

Bourgondien, Brabant, Vlaenderen, Henegouwen, Hollant, ende uut andere landen dye daer hoer woenstat nemen wouden, dat si die husen ende woningen souden mogen restaureren ende wedermaken, opdat overmits sulken vermaerden ende excellenten stat dye geestlicheit ende geestlike personen weder in hore possessien ende besittinge comen mochten. Ende sant dair tot bescermenisse ende tot enen regente van der stat ende des lants enen prefect ende stedehouder, here Gwye van Brimoer, baroen ende here van Hombercoert, settende bi hem tot enen hulpe den here van Witthem. Dese edele here van Hombercoert is gecomen mit alle den canonicken ende geestliken personen, mit religiosen ende andere voirvluchtige ende uutgeweken ende eerbare verdreven mannen, ende hebben die stat weder begrepen, gerepareert ende getimmert; mer niet in sulker grootheit als si geweest was, wanttet tevoren een grote ende brede stat was, ende tot veel plaetsen ydel ende ledich, also dat si die niet al mit volc vollen noch besetten mochten. Mer allencken, nu hier, nu daer een plaetse te begripen ende te betimmeren, dattet nu weder een scone gedaente ende wel getimmerde stede is.

Item. In ditselfde jaer van LXIX, in die Vasten, hebben Onse Liever Vrouwen broeders een plaetse begrepen in Outdorp, bi Alcmer, tusscen Nyeburch ende Middelburch, ende hebben dat bewoent doer donacien, ghiften ende believen hertogen Kaerls van Bourgondien, Aelbrecht van Raephorst, scout van Haerlem ende des rentemeesters van Noort-Hollant.