Hoe dat sommige van den ballingen ende voervluchtigen burgeren van Ludick bestreden ende verwonnen worden.
Dat XXI capitel.
Als die stat van Ludick ghewonnen wert stormenderhant, als voerseit is, liepen vele van den burgeren uuter stat om haer lijf te bergen, ende lagen in bosschen ende holen van den steenbergen verborgen, ende waren sere van herten verslagen, dat si haer husen ende hoven sagen staen bernen, ende datter genen hoep op en was te wederkeren ende opten horen te comen, ende waren sere vervaert ende desperaet. Ende liepen al gelijc int lant van Francemont, want si dair vry wesen mochten; wanttet een onwinber landeken is, daer men niet lichtelic in comen en mach. Ende is al omme mit hogen bergen beset, hebbende binnen vele vaste dorpen ende II starcke castelen, ende wert geheten Francemont, als een vry geberchte, ende was op die tijt vol van vele cloeke mannen. Als si vernamen dat die hertoge weder van der stat gereist was, quamen si te met binnen der stat, om te soeken horen verborgen scat, die si daer gelaten hadden. Ende ondersoekende ende ondergravende die stat, destrueerden ende vernyelden si voert datter was bliven staende, ende daertoe vele kercken ende cloesteren. Ende togen int lant van Lutzenburch ende Limburch, ende deden daer grote scade van roven ende branden, ende namen altijt horen recours ende toevlucht int lant van Francemont. Die hertoge dit vernemende, sant derwerts sinen bastert broeder here Anthonis mit een deel uutgelesen wapentuers, ende heeft dese verbannen ende voervluchtige Lukeners bevochten, heimelic ende openbaer; ende daer werter mit allen veel geslagen, ende verdreef se uuten lande. Daerna is hi gereist tot Brugge, houdende dair die feest van den Gulden Vliese ofte Toyson, ende daer waren bescreven alle die heren van der Ordene om ter feesten te comen.
Auteursrechtelijk beschermd