Hoe die stat van Aken van den hertoge ghecorrigeert wert.
Dat XX capitel.
Die hertoge bleef noch XII dagen binnen Ludic ende sette die stat in goeder ordinancie, nadattet hem goet dochte; ende op Sinte Martijns avont daerna bereide hi hem mit XXV M wel gewapende mannen te trecken op dye stat van Aken, omdat si den Lukeners assistencie ende bistant van wapenen ende bussen tegen hem gedaen hadden. Ende die hertoge was op dese tijt tot Maestricht. Dit vernemende die regenten ende oversten van der stat van Aken senden notabele ende wijse mannen tot Maestricht by den hertoge, ende vielen hem te voete, presenterende die slotelen van der stat, ende beloofden hem te ontfangen tot allen tiden minlicken ende vrientliken, biddende ghenade van tghene dat si tegen sine vorstelike majesteit misdaen hadden. Ende beloofden hem noch te gheven binnen den termijn van III jaren die somme van LX M Rijnsche Gulden. Ende die hertoge woude van hen hebben C M, mer het wert gedadinct, als dat si LXXX M geven souden, ende daervan stelden si borge ende sekerheyt mit sekere brieven, hem obligerende; ende si hebben den prince hoechliken gedanct ende sijn mit groter bliscappen weder thuys gekeert.
Auteursrechtelijk beschermd