Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat die cappeteinen des hertogen van Bourgondyen dye stede van Tongheren wonnen ende beroefden.
Dat XVIII capitel.

Als dese mare voer den hertoge quam, dat die Lukeners sinen lieven neef, here Lodewijc van Bourbon, biscop van Ludic, ghevangen

[p. 320r]

hadden, was hi uutermaten sere gestoert, ende alle die princen, edelen ende riddderen van sinen palayse, doende by hem comen here Adolf van Cleve, here van Ravenstein; here Antonis, die bastert van Bourgondien; den here van Blemont, maerscalc van Bourgondien; den prince ende grave van Arangen, ende here Pieter Hacheback, sinen hofmeester, ende beval hemluden te trecken mit een deel gewapents volcs in den landen van Ludic. Dwelc si terstont volbrochten, ende reden mit een groot garnisoen, ende quamen omtrent die stede van Tongeren, ende wonnen dye, ende quamen daer mit crachte in, verslaende allen dengenen die doorsake geweest waren van den verraderie ende innemen van der stede, berovende ende pilgerende die stat van gout, silver ende andere cleinoden, ende alle dat si crigen mochten. Dese stede van Tongheren plach hier voertijts te hieten Octavia, ende was lange tijt ghebouwet ende getimmert voer Ons Heren geboerte, daer Sinte Servaes alreeerst sinen biscoplicken zetel gheset hadde; ende overmits hoer uutnemende boesheyt translateert ende geset wert tot Maestricht. Ende nae Sinte Lambrechts doot dede Sinte Hubrecht de setten tot Ludic. Dese stat was hier voermaels een grote starcke ende onwinlike stat geweest, ende hadde grote dominacie ende heerscappie over tlant. Mer om hore partye ende twedracht is si seer vernedert ende tot nyet ghecomen.