Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat die Lukeners vingen heren Lodewijc van Bourbon, horen biscop.
Dat XVII capitel.

Als dese dingen aldus binnen der stat van Ludic gehandelt ende tracteert worden, lach here Lodewijc van Bourbon, biscop van Ludic, binnen die stede van Tongeren mit een uutgelesen geselscap van ridderen ende zoudenieren, ende betroude hemselver sere in sine mogentheit. So waren binnen der stede enige rebellen ende quaetwilligen, die hem heymelic verbonden mitten Lukeners, ende wouden tot horen geboden staen; waerom ordineerden die Lukeners here Vincent van Bueren, heren Jan die Wilde, mit meer andere capeteinen, mit een grote menicht van burgeren ende zoudeniers, ende sijn op enen sonnendach des snachts al heimelic gecomen binnen die stede van Tongeren, want die mueren noch al plat ende gedestrueert lagen, slaende in den inganc meer dan CCC edelen ende eerbare poorters; ende alle die si bevonden gewapent ende geteykent mit hertoge Kaerls ende des biscops teiken, sloegen si ter doot, onder diewelke dat waren die grave van Eldren, II heren van Tris ende II edele broeders van Arkenteel; here Jan van Sereynen, here Robbrecht, proest van Sinte Gerioens tot Colen, ende here Miloen, thesauryer des gehelen Stichts van Ludic, mit meer andere edelen, heren ende ridderscappen, dat seer te beclagen was. Nochtans ontquammer vele, die mit groter listicheden half naect ontvloden, als here Jan van Bergen an Zoem, ende meer andere. Die biscop Lodewijc mitten legaet van Romen berchden hem ende liepen in Onser Liever Vrouwen kercke. Die Lukenaers dit vernemende, liepen mit groter verwoetheit voir die kercke, die gesloten was, ende deden hem seggen dat si vry uutquamen, men soud se niet misdoen; ende si namen den biscop mitten legaet, ende brochten se tot Ludic. Ende onderwegen bescreyde ende beclaechde die biscop sere den doot der groter ende edelder heren, die daer verslagen waren, ende die legaet trooste hem, seggende: 'Here, laet ons God loven ende dancken dat wi in dye verwoetheden ende hetten niet mede verslagen en sijn.' Ende aldus so bleef die biscop binnen Ludic gevangen.