Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat hertoge Kaerle gehult ende ontfanghen wert in den landen van Hollant, Zeelant ende Vrieslant.
Dat XIIII capitel.

Als dese feeste van der brulofte, dye met groter excellenter costelicheyt, majesteyt ende blyscappen gehouden ende voleynt was, heeft die hertoge hem bereit om te trecken in den landen van Hollant, Zeelant ende Vrieslant, ende heeft mit hem ghenomen¹³⁰ heere David, biscop van Uutrecht, sinen broeder, ende here Lodewijc van Gruythusen, stedehouder van Hollant, mit meer ander princen, heren ende vorsten, ende is mit groter staet ende eer ghecomen in des sGravenhaghe op Sinte Marien Magdalenen avont, ende wert aldaer, ende voert in allen anderen steden ende plecken van Hollant ende Vrieslant, gehult ende ontfangen mit groter eren, feesten ende blijscappen voer enen heer ende grave van Hollant ende

130 gehnomen AB.

[p. 318v]

here van Vrieslant, ende voert in Zeelant dijergeliken; ende alle steden ende poorteren ontfingen van hem haer rechten ende poorterscap, ende alle leenmannen ende vasallen hair lenen ende leengoeden, ende alle steden, dorpen ende landen, heren ende regenten der landen; ende sijn tresoer ende scat wert oneindelic, ende is geworden een glorioes machtich ende ontsien prince ende vorst, ende die fortune was seer met hem.