Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat hertoghe Kaerle van Bourgondien troude ende te wive nam Margriet, des coninc Eduwaerts suster, die IIII van Engelant.
Dat XIII capitel.

In den jaer M CCCC LXVIII, als die mogende hertoge Kaerle wedergekeert ende gecomen was in sinen landen mit groter triumphen ende victorien, die hy opten stat ende tlant van Ludic vercregen ende gehadt hadde, ende rustende was in sine pallaes, heeft hy voer hem genomen om te trouwen tot sinen geechten wive Margriete, hertoge Ritzaerts dochter van Jorcke, ende coninc Eduwaerts dye III suster van Engelant, die wilen eer bi sinen heren vaders tijden here Anthonis die Bastert, sijn broeder, ondertrout ende besproken had. Ende heeft dese bruloft institueert ende geset te houden in de stede van Brugge, daer hy een alten groten sconen ende wonderlicken pallaes ende huys

[p. 318r]

dede tymmeren ( wonder waer te scriven van sine lancheit, breetheit ende hoecheit ( ende dede dat verchyeren mit costelicken gulden lakenen ende tapesserien van wonderlicker vreemde historien, gewrocht van goude ende silver, ende mit duerbare precieuse stenen ende dyamanten. Ende heeft in den eersten een costelic hof doen beroepen doir alle sine landen, van allen den princen, baroenen, heren ende ridderen. Ende heeft aldaer ghehouden mit groter solemniteyten ende triumphe die feeste van der Oerden van den Gulden Vliese, om dye te renoveren ende te vernyewen, wanter zommighe heren van der selver Oerden gestorven waren. Soe sijn dan daer mede getogen uut desen landen van Hollant ende Zeelant, behalven die baroenen, heren ende ridderen die uut anderen landen daer mede gecomen waren, heer David van Bourgondien, biscop van Uutrecht; sijn bastert broeder, heer Ghijsbrecht van Bredenrode, domproest van Uutrecht, mit andere heren ende edelen des Stichts. Here Lodewijc van Gruythusen, stedehouder van Hollant, Zeelant ende Vrieslant; heer Reinolt van Bredenroede; here Henric van der Vere, baroenen; ende dese III mitten here ende grave van Oestervant waren allene uut desen landen van der Oerden des Gulden Vliese. Nu hadde die mogende coninc Eduwaert van Engelant oec grote ghereetscap gemaect ende hadde vergadert grote machtige princen, baroenen ende ridderen, om sine suster Margriet, die een uutermaten sconen ende suverlicke persoen ende princhesse was, over te senden den prince, hertoge Kaerle van Bourgondien, met groter feesten, glorie, eer ende majesteyt. Ende is mit een grote menichte van hertogen, graven, princen, heren, vrouwen ende jonffrouwen te scepe gegaen ende zijn mit enen geluckigen¹²⁹ winde gecomen ter Sluys in Vlaenderen, ende vandaen quam si ten Damme, daer si van den hertoge ende alle sinen heren mit groter eeren ende vroechden ontfangen wert, ende brocht se voert binnen Brugge; ende daer wert die bruloft gehouden mit soe groter costelicheit, feeste, ere, glorie ende solemniteyten, dattet onmogelic wair te bescriven die triumphen, vroechden ende blijscappen die daer ghescieden van tornieren, steken ende campvechten ende andere ridderlicke oeffeningen, ende elc om costelic mit groter pompositeyten ende chyerheden, dattet onsprekelic is. Dye overvlodicheit van spijse ende drancke, ende boven alle die excellente precieusheyt van gouden ende silveren vaten ende andere costelicheit en sijn niet te estimeren, want si overvloedich daer waren. Die genoechten, blyscappen ende solacen van snaerspille ende van allen andere instrumenten van musijke, van sange en is niet te spreken. Die exempte ende wonderlike monsteren die daer appareerden ende getoont worden in den manieren als of si geleeft hadden, en is niet scrivelic. Ten is in smenschen memorie niet, noch gehoechnisse, dat ye keiser, coninc of prince sulke feeste ende costelike brulofte gehouden heeft. Die hertoge thoonde minnelic sijnre liberaliteyt ende miltheit, begavende den princen, heeren, vrouwen ende jonffrouwen, ende bisonder den heralden uut Engelant mit costelicke cleynoden ende chyerheden. Ende alle die heren ende princen gaven des getugenisse ende seyden dat gheen keiser, coninc ofte prince in kerstenrijck en ware te gheliken den hoghe gheboren vorst ende prince hertoghe Kaerle in rijcdomme, ere, glorie, majesteyt ende mogentheit.

129 geluckingen AB.