Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe die hertoge onder hem brocht thele lant van Ludick.
Dat XI capitel.

Als dit gesciet was, brac die hertoge op, ende beleide die stede van Hasselt. Die ingeseten berieden hem wijslic, ende gaven hem op in sprincen handen. Ende hi nam se in genaden, op condicien dat si mede in alle scijn ende manieren doen souden als de van Sint Truyen gedaen hadden. Ende die hertoge toech voert mit alle sijn volc ende wan al dat hele graefscap van Loen. De fortune

[p. 317r]

ende avonture was seer met hem want¹²⁵ alle sloten ende steden als Burchloon, dair tlant zijn naem of heeft, Harc, Bilsen, Bree, Maseyc ende Baringen; ende alle dese steden dede hy haer poorten, toornen ende muren nederleggen ende slechten gelicken hi die van Sint Truyen ende Hasselt gedaen hadde. Ende dair en bleef stede noch slot int hele lant, si en gaven hem alle gader in sprincen handen. Dairna sant hy den here van Blemont, maerscalc van Bourgondien¹²⁶ met een groot scaer volcs te paerde ende te voet voer die stede van Tungeren. Ende als hi die stede ghenaecte, quamen die poorters uut mit bloten hoofden, ende begeerden genade ende hem op te gheven in sprincen handen, ende nam se op uut des hertogen name, in manieren als voer van den anderen steden geseyt is. Hierna hebben hem alle dye steden des lants van Ludic in handen van den prince opgegeven, als Weset, Huwy ende Tuwyn; die stede van Dynant en wert op dese tijt niet bewoent, want si al gheheel verwoest ende destrueert lach, want die ene stene en was opten anderen niet gebleven. Die stede van Maestricht bleef oec in dese oerloge ongescent, want si tusschen beiden stille sat, ende moeyde hoir des orloechs niet; want dene sijde van der stede an tlant van Brabant hoert, ende dander sijde an tSticht van Ludic; aldus en had si geen last.

125 wan AB.

126 Bourgodien AB.