Hoe die stede van Sint Truyen gewonnen wert.
Dat X capitel.
Die ingeseten van der stede van Sint Truyen vernemende hoe dat die Lukeners tot allen plecken terneder getogen waren ende verwonnen, vreesden seer des hertogen mogentheit, ende beduchten dat hem gescien mochte als dien van Dynant geboert was des jaers daer te voren. Die mogende prince hertoge Kaerle niet oflatende van sinen voernemen endeGa naar voetnoot124 opset, heeft mit groter macht doen beleggen die stede van Sint Truyen, ende dede dairvoir oprechten grote bussen ende andere instrumenten om die stede te becrachtigen, ende dede menich swaer assault an die stede. Ende als hi VII dagen lang die stede seer bestormt ende seer gequetst hadde mit scieten, anmercten die poorters des princen mogentheit, ende dat si gheen ontset van yemant verwachtende waren, deden si haer poorten open, ende quamen uut mit bloten hoofden, ende vielen voer des princen tente op haer knyen, ende begeerden ghenade ende die stede op te geven in sprincen handen, ende wouden staen tot des princen seggen ende bevelen. Ende hi nam se op in genaden in deser manieren: Als dat si selver alle hoer muren van der stede, poorten ende toornen mosten ofbreken ende in die graven werpen, ende dat si hem voer enen momber ende voecht ontfangen ende nemen souden des Stichts van Ludic; ende daervoer mosten si hem geven een grote somme van penningen. Dit belooft hebbende, stelde hi in die stede een cappetein mit een groot garnisoen van zoudenyers, om dese beloften ende compromissien te volbrengen. Ende waert sake dat si in eniger manieren rebelleerden ende niet doen en wouden als voerseit staet, dat hi alsdan die stede pilgeren, beroeven, ende an brande steken soude ende verwoesten. Dye poorters verduchtende die verderfnisse hare stede, deden altesamen als voersproken is, ende braken die mueren, poorten ende toornen of ter aerden toe.
Auteursrechtelijk beschermd