Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat die van Ludic uutquamen om die stede te ontsetten, ende hoe si van den hertoge bevochten ende verwonnen worden.
Dat IX capitel.

Die van Ludic vernemende dat die hertoge in den landen van Loon gecomen was, ende dat hi mit groter cracht die stede van Sint Truyen¹²² belegen hadde, waren des qualiken te vreden, ende vreesden des hertogen mogentheyt seer. Hoer cappeteinen voirgenoemt spraken hemluden goeden moet toe, ende verwecten se seer om enen strijt tegen den hertoge te slaen seggende: 'Laet ons ineen vergaderen alle onse macht, ende wi willen tegen hemluden uutgaen te striden voer onse lant ende rechten, ende wi sullen sonder twifel victorie hebben.' Ende dese cappeteinen hilden dagelicx raet hoe sijt best anleggen souden om enen strijt tegen den hertoge te vechten, ende hebben ondereen geconcludeert, gesloten ende mit enen bode openbaerlic uut doen roepen, dat elc op sulcken benoemden dach int harnas wesen soude, om mit machte te trecken ende te ontsetten die stede van Sint Truyen, ende wouden in eenre stilre nacht comen in dat heer ende dat overvallen mit scutten ende mit slagen onversienlic. Voert, so was gepubliceert ende uutgheroepen, so wie uut dat heer vluchte of wechliepen, van wat state ofte condicien dat hi ware, den sout men terstont dootslaen ende van alle sine goeden priveren ende beroeven. Uuter stede gegaen wesende met een grote menicht van volck, om dye stede van Sint Truyn mit cracht te ontsetten, nemende mit hem priesters, canonicken, monicken ende alle die si wisten des bisschops ende des hertoghen fautoren ende vrienden te wesen, ende deden die staen int voerste van den strijt. Die hertoge hadde schier dese tidinge vernomen, ende dede sijn volc stellen in ordinancie om te striden. Tusscen elcken van desen III battaelgen was een halve myle weechs verscheiden om die benautheit der plaetsen, want des volcs veel was. Omtrent V uren in den avont quamen die Lukenaers mit groten ghecrye van trompetten gedringen op die battaelgen van here Anthonis, die bastert, ende dair wert een groot geroep ende rumoer onder den Lukeners. Want sonder merren gheboet die bastert sijn volc an te gaen ende vromelic tegen den vianden in te treden, ende quamen also stouteliken angetreden ende scoten so vreesliken mit gescutte ende bossen op den Lukeners, dat si hem tot gheenre ordinancie stellen en mochten, ende weeken een stuck afterwerts. Hierenbinnen quamen die hertoge an dene side ende die here van Ravenstein an dander side, besloten ende besingelden dat here al omme. Die Lukeners slaende haer ogen op, sagen dat si van allen siden¹²³ al omme besingelt waren ende dat alle dat grote heer op hem gereden quam, worden vervaert ende worpen haer wapenen van hem ende bestonden te

122 aldus C; Ludic AB.

123 sidenn AB.

[p. 316v]

lopen. Here Raes van Heer dit siende, hoewel hi een van den oversten cappeteinen was ende tgebot hadde doen gaen dat niemant op die verboernisse van live ende goet wechlopen noch rumen en moste, nam terstont alle dat ghelt ende den scat dat dye van Ludic daer gesonden hadden, ende reet daermede na Vrancrijc toe. Die andere, dit siende, bestonden mede te vlyen ende te lopen, elc alle dat hi mochte, sonder ommesien. Denwelken die Bourgongoens snelliken vervolchden ende sloegen se mit groten hopen, hier ende daer, ter doot. Mer also den avont genaecte ende si sorchden oft die Lukeners enige heimelicke lagen geleyt mochten hebben, werdt daer een teyken ghedaen om weder te keren, ende die Lukeners verberchden hem in bosschen ende hagen, ende liepen alle meest na Vrancrijc toe. Dese nederlage gheschiede bi tcloester van Zepperen, an die zuytside van Sint Truyen, omtrent Sinte Simon ende Sinte Juden dach. Ende daer bleven omtrent III M Lukeners verslagen, onder welken dat waren heere Herpert van Zorleth, ridder, mit sinen soen, canonick van Ludic; here Staes van Stralen, hoer bannyerdrager; Wayo, canonick van den Dom, ende Roelant van Hensberch, here Jans van Hensberch, biscop van Ludic bastertsoen. Als die hertoge dese victorie vercregen hadde tegen sine vianden, vant hi onder andere roefgoeden C bussen ende vele wimpelen van den ghilden; ende in desen stride ordineerde ende maecte die hertoge CCC ridderen, daer dese nagescreven in desen lande van Hollant ende Zeelant of waren Jan van Cruningen; Zweer van Montfoerde; Aelbrecht van Scagen; Willem ende Jan Ruychrocxs, die men Van den Werf noempt. Des anderen dages verhoerde die here van Ravenstein, datter omtrent V C Lukenaers niet verde vandaen verborgen lagen, ende heeft terstont een deel volcs genomen, ende heeft se al omme besingelt ende verslagen.