Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe die stede van Sint Truyen beleghen werdt.
Dat VIII capitel.

In ditselfde jaer, in die maent van october, heeft hertoge Kaerl van Bourgondien groot volc van wapen vergadert, crigende in sijn hulp here Willem van Gulic, grave van Blanckenhem, mit ontelliken veel volcs uut allen nacien ende provincien; ende daertoe den grave Engelbrecht van Nassouwen, mit vele edelen ende vasallen uut Brabant. Ende daer quamen oec by hem uut Hollant cloeke ende vrome wapentuers, daer die overste of waren here Lodewijc van Gruythusen, stedehouder van Hollant; here Henric van der Vere, grave van Grotevelt; Wolfert, grave van Bocham; sijn soen Adriaen, here van Cruningen, burchgrave van Zeelandt; Adriaen van Borselen, here van Brigdam; Zweer van Montfoert; Aernt van Sweten; Aelbrecht ende Willem, des eersten heren Willems zonen van Scagen; Floris, des graven bastertzoen van Oestervant; Willem ende Jan, Jans Ruychrocx sonen, ende meer andere grote baroenen, ridderen, heren ende sciltknapen uut Vlaenderen, Henegouwen, Piccardien ende andere landen, also datter een grote ontellike menichte van volc van wapenen vergadert was; ende mit alle dit volc hadde hi opgenomen te trecken int graefscap van Loon.

So is te weten dat dat graefscap van Loon voermaels geregeert ende berecht werde van hoer eygen heren ende graven, als voer geseyt is bi tiden van grave Willem, die XIII grave van Hollant, die den grave Lodewijc van Loon crachtelic uut Hollant verjaechde. So ist geboert in den jare M CCC XXXVI, dat een grave van Loon, genoemt Lodewijc, sonder kinderen after te laten gestorven is; ende dat graefscap van Loon is bi rechter erfnissen devolveert ende ghecomen an die kercke van Ludick. Want des graven Lodewijcs overoudevader hadde dat graefscap van Loon geoffert ende gegeven opten heiligen altaer Sinte Lambrecht, den heiligen biscop ende martelaer, ende ontfinct weder van den biscop te leen; dwelcke een coninc van Romen tot Franckenvoert geratificeert ende geconfirmeert heeft, dat so wanneer een graef van Loon oflivich worde sonder kinderen, dat alsdan dat graefscap voerseit devolveren ende comen soude an dat bisdom van Ludic. Ende aldus ist mit groter swaricheyt ende moyenissen gecomen an dat bisdom, ende heeft hem dat graefscap mitter stat van Ludic verenicht ende gestelt in rebelheit tegen horen here ende biscop. Ende alsdan dit grote sware heer bieenvergadert was van den hertoge, worden daer gevonden ende ghetelt te wesen boven XXXII M paerden, behalven alle dye te voet waren. So is dan die hertoge opgeseten omtrent Sinte Franciscusdach ende mit alle dit volc getogen om eerst te bevechten dat graefscap van Loon, ende is in eenre welmanierde ordinancie uut Loeven ghereyst: eerst dye archyers; daeran dye edelen; doen quam die hertoghe, hebbende op sijn helme dye lelye van Vrancrijc; daeran quamen VI edele jonghen, hebbende elcxs een helme mitten leeuwen van Vlaenderen, Brabant, Henegouwen, Hollandt, ende andere helmteykenen sijnre landen; ende dese ordinancie hilt hi altijt als hi in enigen oerloghen ende striden trecken soude. Ende alle dit grote volck van wapenen is ghecomen in dye graefscap van Loon. Als die hertoge tot Thienen quam is hi daer

[p. 316r]

een weinich tijts ghebleven . Ende hebben hoer tenten ende pauwelioenen in groter mogentheit opgeslagen voir die stede van Sint Truyn, in die graefscap van Loon gelegen. Ende die stat was alomme wel ende vast besloten, uut vresen des hertogen volc, dat daer niemant in noch uut en mochte. Ten lesten is die hertoge selver gecomen, ende heeft sijn volc geordineert in III battaelgen: In den eersten was beleetsman here Adolf van Cleve, here van Ravenstein, des hertogen broeder van Cleve. Den anderen belede here Anthonis, die bastert van Bourgondien. Ende die III battaelge regeerde die hertoge selver. Ende dit aldus ghedaen wesende wert die stede nacht ende dach angestormt mit menigerley gescutte van bogen, van clovers ende van grote bussen, ende daer wert menich stout assault gedaen, dat menich man sijn lijf coste. Ende die van binnen setten hem vromelic ter weer, ende keerden die vianden mit menigerhande instrumenten van die muren. Op een tijt gevielt dattet een seer nevelachtich ende duyster weder was, dat die hertoge alle sijn volc dede comen an die zuytsyde van der stede; ende an die noortside van der stede, daer die tenten ende pauweljoenen opgerecht stonden, dede hi vele grote vieren ontsteken. Die van binnen meenden dat daer alle tvolc vergadert was, scoten si mit allen seer ende vreseliken na dat vier toe, menende groot volc doot te scieten. Ende aldus waren si bedrogen, ende verscoten hoer cruyt ende andere instrumenten alle te samen vergeefs.