Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van enen strijt die here Adolf van Cleef, here van Ravenstein, des hertogen van Bourgondien overste cappetein ende hooftman had tegen die van Ludic.
Dat VII capitel.

Die hertoge van Bourgondien, dit vernemende, is uutermaten gram ende toernich geworden, ende heeft alle sine heren, capeteinen ende hooftmannen doen vergaderen om raet mit hem te nemen op dit oerloge van Ludic, ende heeft den here van Ravenstein geordineert ende gemaect overste cappetein ende hooftman van sinen volc van wapene, ende heeft hem gesonnen ende geset te defenderen ende te bescermen die frontieren ende palen van sinen landen, opdat die Lukeners voert meer geen scade van roven ende branden en souden doen, ende dat hi daer bleve ter tijt dat hi selver quame mit meerder macht van volc. Die here van Ravenstein is getrocken mit groot volc van wapenen ende heeft hem onthouden omtrent die stede van Hoey, om die palen van den landen te bescutten. Dit vernemende die Lukeners, quamen mit groter macht uuter stat, ende wouden den here van Ravenstein mit machte uuten velde slaen ende verdriven, daer hem dye Bourgongoense vromelic tegen stelden. Ende daer viel een

[p. 315v]

grote scermutsinge, ende die Lukeners quamen so vreseliken gedringen opten Bourgongoens, dat si van noots wegen afterwerts rumen mosten, ende begaven dat velt, ende daer bleeffer omtrent CCC verslagen. Weinich tijts hierna vergaerde die here van Ravensteyn weder een nyeu heer ende een grote¹²⁰ scaer van volc, ende quam weder om sijn leet ende misval te wreken. Dit vernemende die van Ludic ende Hoey, quamen hem vromelic tegen, niet twifelende weder victorie te hebben. Ende als dese II¹²¹ battaelgen an malcanderen gecomen waren, wert daer vreeslicken gevochten ende sloegen mit allen seer op malcanderen om die overhant; ende dair werter mit allen veel ter aerden gevelt, so an deen side, so an dander. Ende als si lange tijt dus vromelic teghen malcanderen gevochten hadden, cregent die Lukeners int einde te quaet, ende weken afterwerts; ende daer bleven omtrent IX C man van den Lukeners verslagen, ende dander liepen weder na der stadt.

120 grdte AB.

121 LI AB.