Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat here lodewijc van Bourbon, bisscop van Ludic, verjaecht wert uut die stede van Hoy.
Dat VI capitel¹¹⁹

Die eerwairdige here Lodewijc van Bourbon onthilt hem op dese tijt binnen der stede van Hoey, ende en quam binnen Ludic niet, dwelck die Lukeners niet wel liden en mochten; ende wouden hem uut Hoy verdriven oft dootslaen. Mit grote macht hore burgeren quamen si binnen der stede van Hoey, mits hulp ende bystant sommiger poorteren van binnen, omtrent Heilich Cruysdach in den herst. Die biscop onthilt hem op deen side van der stede, ende toech haestelic ander cleder an, overmits groten geroep ende ghecry, ende lach een wijl tijts verborgen. Ende als hi sach dat die stede gewonnen was, ende dat si dat slot beleggen wouden, is hi doer heimelike plecken ende toepaden uut dat slot gecomen, ende is mit groter periculen ende vresen tot Namen in der stat gereden. Die Lukeners vernemende dat die biscop ontcomen was, deden uut groter verwoetheit alle des biscops fautoers ende dienres wredelic tracteren ende dootslaen. Dit dus deerliken volbrocht wesende, bevalen si die stede te bewaren enige van hore burgeren mit een cappetein, ende toghen weder na Ludic.

119 In AB komt hoofdstuk 5 niet voor.