Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van Kaerle, hertoge Phillips enigen soen, grave van Hollandt, Zeelant ende here van Vrieslant, die XXVII.
Dat II capitel.

Die doerluchtige ende mogende vorst hertoge Phillips, ghestorven ende begraven wesende, is Kaerle, sine enige wittachtige sone, geworden, gehult ende ontfangen bi erflicker successien hertoge van Bourgondien, van Lottringen, van Brabant, van Limburch, van Lutzenburch, grave van Bourgondien, van Artoys, van Vlaenderen, palatijn van Henegouwen, van Hollant, van Zeelant, van Namen, here van Vrieslant, van Mechelen ende van Salins, marcgrave des Heiligen Rijcs, ende also hi groten swaren scat van gout ende silver van sinen vader genomen hadde, so coft hi int eerste jaer sijnre dominacien dat graefscap van Ferretten, gelegen in den landen van Elzaten, by der stat van Bazel opten Rijn, van hertoge Zegemont van Oestenrijc, die dat toebehoerde; ende also dit verde van sinen landen gelegen was en konde hi dat niet wel defenderen ende bescermen tegen andere princen ende heren, sine vianden, de dat dicwils anvochten ende beroefden; wairom dat hi dat hertoge Kaerle vercofte, wanttet an sine landen gepaelt ende gelegen was. Hem was eerst tot enen wive versekert Katrine, coninc Kaerls dochter van Vrancrijc; si starf jonc. Daerna nam hi te wive hertoge Kaerls dochter van Bourbon, genoemt Elizabeth, daer hi niet meer kinder by en hadde dan een enige dochter, geheten Maria. Als dese vrouwe Elizabeth gestorven was, nam hi sijn derde wijf, genoemt Margriete, hertoge Ritsaerts dochter van Jorcke,

[p. 314r]

coninc Eduwaerts die IIII suster van Engelant, als na geseit sal worden. Hi dede oec bi sinen vaders tiden bedyken een groot stucke lants neffens Rotterdam over, dat hi dede noemen tlant van Charloys. Hi hadde oec beghinnen te maken een alten wonderlijcken structure ende fortresse an tcasteel van Gorichom; ten worde niet volbrocht. Hi verbrede ende vermeerde sere die titelen sijnre dominacien¹¹² ende heerscappien, als na geseyt sal worden. Hi was een cloec, stout ende vroem man ter wapenen, scoen ende bequaem van sprake, claer ende subtijl van verstande, een goet, rechtvaerdich justicier, wijs ende doersichtich in rade, vermaert ende doerluchtich in menigerley gracien ende eerbare manierlicheden, sere ontsien boven allen princen ende heren van kerstenheden.

112 domacien AB.