Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Anno M CCCC ende XCIII.
Keyseren.

Maximiliaen, des keyser Frederijcks dye Derden enighe soen, als hij mit sinen vader dat keyserrijck seven jaer administreert ende regneert hadde als Roemsche coninck, gecoren in den jare M CCCC LXXXVI, heeft nu dat rijc allene accepteert ende angheheven te regneren in den jare M CCCC ende XCIII, ende heeft hem bereet op des rijcks costen mit groter macht ende triumphe tot Romen te trecken doer instancie ende begheerte des paeus Julius die Twede

[p. 313v]

om gecroont te worden mitter keiseliker cronen, so wert hi van den coninc Lodewijc die XII, die doe Meylanen in hadde ende van den Venechianen, die mit malcanderen aliance ende verbant gemaect hadden, so crachteliken wederstaen, dat hi dat niet volbrengen en mochte sonder grote bloetstortinge daeromme te geschien. Also hi sijn beste ghedaen hadde omme te Romen te comen, consenteerde hem die paeus Julius dye II dat hij hem scriven mochte gecoren keyser van Romen. Dese hoech geboren ende doerluchtige vorst Maximilaen, gecoren keyser van Romen, heeft binnen sinen tiden vele oerlogen ende striden gehadt int conincrijc van Hongarien, van Bemen, in Ytalien ende Lomberdien, in Vrancrijc, in Vlaenderen, in Hollant, in den Sticht van Uutrecht, tegen den Zwitsen,¹¹¹ ende in Hoech Duytslant, die te lang souden vallen hier te scriven; wat hi hier in desen Neder Duytsschen Landen bedreven ende gedaen heeft, sal men eens deels hierna bescreven vinden van den tijt dat hi vrouwe Marie, hertoge Kaerls van Bourgondien enige dochter, te wive nam, dwelc was in den jare M CCCC ende LXXVII; ende na haer doot nam hi te wive Blancke Marie, des hertogen Galiaes' dochter van Meylanen, int jaer M CCCC XCIIII, ende die starf sonder kinder.

111 tZwitsen AB.