Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe here Antonis, die bastert, gesonnen wert als ambassatoer tot coninc Eduwert de III van Engelant, te versoeken ende tracteren van een huwelic tusschen den grave van Charloys ende vrou Margriet, des conincs suster.
Dat LIII capitel.

Op dese tijt regneerde in Engelant dye machtige coninc Eduwaert, die IIII van dier namen, die dat conincrijc met groten swaren oerlogen ende striden geconquesteert ende tot sijnre subjectien gebrocht hadde. Dese coninc Eduwaert had een suster, genoemt Margriet, die utermaten scoen van lichaem ende manierlic van zeden verchyert ende vermaert was, dat men in allen landen van horen name ende fame tseggen wist. Die hoechgeboren vorst hertoge Phillips onder hem hebbende vele landen ende provincien, verhorende van die scoenheit ende manierlicheit van deser joncfrouwen, des conincs suster, dochtet hem goet ende nuttelic wesen om sinen soen, den grave van Charloys, te hijlicken an dese scone joncfrouwe, daer die grave oec sere na verlangde ende begeerlic was. So sijn dan legaten ende ambassaten uut allen den heren gesocht ende uutgecoren, ende bisonder die vrome ende wise here Anthonis die Bastert, diewelke geordineert ende gescict wert om desen versoeke te executeren ende te volbrengen, want hij een wijs ende voersichticht man was in allen saken ende commissien voerspoedelic voirtgaende. So heeft hi hem doer beveel van sinen vader ende broeder dairtoe bereit, mit hem nemende CCCC edelen ende wel geboren mannen, die cloecste ende vroemste campvechters, exerciteert ende geoefent in allen steecspelen, tornoyen ende andere ridderlike feyten van wapenen, die hi onder alle den edelen ende heren des volcs van wapenen¹⁰⁸ wist te crigen; ende nam mit hem vele scats, gout, silver, gelt ende cleinoden die men niet vele in die landen hadde. Als de scepen bereit waren ende wel versien van harnas ende attelrie, ende voirt van al des hem van node was, nam hi oerlof an sinen vader ende broeder, ende ghinc te schepe, ende voer mit enen gheluckighen winde in Enghelant, zeylende in die haven mit groter geluyt van basunen ende trompetten, ende quamen

108 mapenen AB.

[p. 312v]

ter stede daer die coninc op die tijt was. Die coninc quam hem te moete, ende ontfingen met groter eren ende feeste. Als here Anthonis sine commissie den coninc ende allen sinen heren opgedaen ende ghenarreert¹⁰⁹ hadde, was hij uutermaten blide, ende seide dat hi sinen wille ende sijns heren vaders ende broeders mit alre affectien ende naersticheit gaerne volbrenghen ende volcomen wilde. Die coninc behielten een wijl tijts bi hem in groter ghenoechten ende solacen, doende by hem comen vele van den edelsten, cloecsten ende vroemsten ridderen ende heren ende banroedtsen uut Engelant, ende sette die tegen die CCCC Bourgongoens, om hem te exerceren ende oeffenen in genoechliken ende tijtliken steecspelen, campen, tornyeren, ende in allen ridderlicken ende princelicken oeffeningen, doende hem die meeste ere ende chyere die men enen here ende prince doen mochte. Die coninc hadde oec doen comen ter selver feeste vele van den edelsten vrouwen ende joncfrouwen des conincrijcs, die desen edelen Bourgongoens oec seere feesteerden ende eerden. Daer waren gehouden vele costlike bancketten ende dansspelen; men gebruycte noch en hoerde daer niet dan alle genoechte, wellusticheit ende eerberheit. Die coninc siende die mogentheit heren Anthonis, ende die edelheit ende doechden der edelen heren ende joncheers, dye mit hem gecomen waren, beloofde hem te wille te wesen tot enen benoemden tijt sinen here vader ende sinen broeder, ende dede daer tegenwoerdich comen die scone creatuere joncfrouwe Margriet, sijn suster, die haer consent ende wille gaf tot desen huwelike, ontfangende van den voorscreven here Anthonis alsulke costelike ende preciose cleinoden als haer gepresenteert worden uuten name des hoechgeboren ende machtigen vorst hertoge Phillips van Bourgondien ende here Kaerle, grave van Charloys. Die coninc begaefde desen here Anthonis mit costlike cleinoden, ghiften ende gaven, ende vernemende den doot sijns vaders, nam oerlof an den coninc ende allen den heren ende edelen, ende sijn wederom te scepe gegaen ende over in desen landen gecomen.

109 ghenarrert AB.