Van enen groten ende feestliken dachvaert van vele princen ende vorsten, gehouden tot Sluys in Vlaenderen.
Dat LII capitel.
In den jare M CCCC LXVII, in die maent van meye, dede de hoechgeboren vorst, hertoge Phillips van Bourgondien, een dachvaert beroepen in die stede van der Sluys in Vlaenderen, van alle sinen princen, baenreheren, ridderen ende edelen van sine landen ende provincien. Totten welken dat quamen here Kaerle, grave van Charloys, sijn soen; Johan, hertoge van Cleve, grave van der Marcke, sijn neve; here Adolf van Cleve, here van Ravenstein, sijn broeder; Adolf, des hertogen Aernts soen van Gelre; here Anthonis, die bastert van Bourgondien, mit meer andere edelen, als hier voer bescreven staen. In denwelken dachvert vele saken tracteert ende gehandelt worden angaende den oerbaer ende welvaren alle deser landen. Ende bysonder wert dair tracteert ende naersteliken gesproken tusscen den hertoge van Cleve ende here Adolf van Gelre, om enen zoen ende tractaet te maken van den twist ende oerloge die si tsamen hadden, ter cause dat hi sinen vader, hertoge Aernt van Gelre, gevangen hilt. Mer alle horen arbeit was tevergeefs, want doer sduvels ingeven was dese here Adolf also gesint dat hi sinen vader gevangen houden woude also lange als hi leefde, oft ter tijt dat hi hem dat lant van Ghelre resigneerde ende overgave. Ende als here Adolf vernam, dat hi van desen gestraft ende gecorrigeert soude worden, dede hi sine paerden sadelen ende reet heimelick wech met groter confusen ende scanden na tlant van Gelre toe.
Auteursrechtelijk beschermd