Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Hoe dat sommige edelen by den grave van Charloys quamen, ende vergaderden in tsGravenhage.
Dat LI capitel.

Dit aldus gheschiet wesende, vruchten ende ontsagen den grave van Charloys alle princen ende heren omtrent dye landen geseten, ende hadden hem als een vroem onversaecht prince in groter eren ende reverencien. Om sine grote victorien voerseyt worde sijn faem seer verbreet in verren landen, ende sijn macht ontsien in allen rijken ende landen. Uut Brabant in decembri gecomen wesende in Hollant, is daer mit groter reverencien ende triumphen ontfangen. So sijn dan aldaer bij hem gecomen vele grote heren, niet alleen uut desen landen, mer oec uut anderen nacien ende provincien, om mit hem te tracteren van vele saken den landen nut ende profitelic wesende, van denwelken dese dye princepaelste ende notabelste waren: Here Jan van Baden, aertsbiscop van Trier. Here Joris van Baden, biscop van Mets, sijn broeder. Here David van Bourgondien, sijn bastert broeder, biscop van Uutrecht. Here Joest, die wybisscop van Uutrecht, van der Minrebroederen oerde. Here Jan Donre, regael abt van Sinte Mathijs tot Trier. Here Gherrit van Poelgeest, regael abt van Sinte Aelbrecht tot Egmont. Hunfrijt, hertoge van Excestre, uut Engelant doe verdreven wesende. Johan, grave van Marle, Pieter, graef van Brianen, ende die grave van Roussy, III gebroeders, grave Lodewijc sonen van Simpol. Willem van Gulic, graef van Blanckenhem. Jacob, graef van Hoern, here van Altena. Die grave van Mandersceyt. Die graef van Zijric, proest van Tryer. Engelbrecht, grave Jans soen van Nassouwen, here van Breda. Des princen soen van Arangen¹⁰⁷. Lodewijc, here van Gruythusen, stedehouder van Hollant. Reinolt, here van Bredenroede, Vianen, Ameyde, ende burchgrave tUtrecht, mit sinen broeder here Ghijsbrecht, domproest van Uutrecht ende proest van Sinte Donaes tot Brugge. Johan, here van Wassenaer. Joncheer Frederic van Yselstein, des heren soen van Egmont. Henric, here van der Vere. Johan, here van Bergen an Zoem. Phillips, here van Grimbergen, sijn broeder. Adriaen van Borselen, here van Brigdam ende van Duvelant. Na desen quamen noch die ambassaten, edele ende notabele heren ende princen des doerluchtigen hertoech Franzoys van Bertangen, denwelken die scutters van Gorichom te moete quamen tot Woudrichom, ende geleiden se tot Gorichom opten Heiligen Kersdach. Daerna hulden ende ontfingen die van Lederdam ende Scoenrewoert grave Kaerle van Charloys tot horen here ende prince. Dit ghesciede op dye burch tot Gorichom. Als nu here Kaerle, grave van Charloys, tlant van Hollant gevisiteert ende

107 aldus AB; Orangen C.

[p. 312r]

doergereist hadde, is hi omtrent Vastenavont wederom getogen na Brabant. So quam tot Brusel die doerluchtige prins ende vorst hertoge Frederic van Beyeren, palensgrave opten Rijn, mit sinen cancellier den biscop van Spiers, mit meer andere grote heren ende princen, mit groter familien ende staet, om te visiteren sinen neve hertoge Phillips van Bourgondien, dien oec mit groter eren ende reverencien gracioselic ende lieflic ontfangen heeft. Daerna reysde hi tot Ghent om te visiteren sijn suster, die daer in een besloten cloester was, levende in groter abstinencien, sonder ymmer meer vleys te eeten. Vandaen reysde hi van deen stede totter anderen, al Vlaenderen doer, met groter eeren ende feesten, ende quam tot Antwerpen. Ende van danen reysde hi weder in Beyeren.