Die cronycke van Hollandt, Zeelandt ende Vrieslant, met die cronike der biscoppen van Uutrecht (Divisiekroniek)

Van den tweesten pays dye die Lukenaers maecten mitten grave van Charloys.
Dat L capitel.

Als die stede van Dynant dus crachtelic ghewonnen ende deerlic ghedestrueert ende verwoest was, vergaerde dye grave van Charloys sijn volck bieen, om te beleggen

[p. 311v]

ende te becrachtigen die stat van Ludick. Als hi alle ding bereyt hadde, ordineerde hi sijn volc, ende stelde hem op die wege om die stat van Ludic te berennen ende te beleggen. Dit vernemende die Lukeners waren seer vervaert ende beanxst, ende ghingen hem teghemoet mit alle hoer burgeren, in swarten gecleet, begerende oetmoedeliken sine gracie ende genade om der passien ons liefs Heren Christi Jhesu, belovende tot ghenen tiden meer tegen hem te rebelleren noch op te staen. Die grave, uut sine princelike goedertierenheyt, nam se nu anderwerf op in sijnre genaden, op alsulker condicien, dat waert sake, dat si derden mael tegen hem rebelleerden ende opstonden, dat si alsdan souden verboeren ende verliesen lijf ende goet, ende souden noch gehouden wesen te onderhouden die tractaten van payse gemaect in der eerster zoenen. Als si dit altesamen willichliken overgegeven hadden, nam hi L mannen van den edelsten ende machtichsten van den bisdom ende uuter stadt van Ludic, ende sette die te ghysel ende te wonen in der stede van Loeven, daer si stadelick souden bliven totter tijt toe, dat si sinen vader den hertoge ende hem voldaen ende betaelt hadden van der excessen ende loftenissen, ende dat alle quaet ende ongelijc tot enen goeden einde ende vrede gecomen ware, ende opdat si ymmers derden mael niet rebelleren noch tegen hem opstaen en souden. Als alle dingen doechtlic ende wel getracteert ende geordineert waren, is die hertoge mit sinen sone den grave mit alle dat heer elck sijns weges weder thuys getogen, ende hebben God gedanct ende gheloeft van die grote victorien die si op haer vianden vercregen hadden.